Moddy’s, Agjencia Ndërkombëtare e Vlerësimit të Kredibilitetit ka ri-konfirmuar vlerësimin aktual të Shqipërisë, “B1 – me perspektivë të qëndrueshme”, në gjykimin vlerësues më të fundit të saj.
Agjencia vlerëson se stabiliteti makroekonomik u ruajt gjatë tre goditjeve të mëdha që prekën ekonominë shqiptare në vitet e fundit, konkretisht tërmeti në fund të vitit 2019, pandemia e Covid-19 në vitin 2020 dhe kriza evropiane energjetike që filloi në 2022 e shkaktuar nga lufta në Ukrainë.
Sipas agjencisë, ekonomia e Shqipërisë do të vazhdojë të jetë rezistente në periudhën 2023-2024.
Gjithashtu, ajo thekson se në periudhën afatgjatë, aftësia e vendit për të mbështetur procesin e konvergjencës së të ardhurave për banorë me vendet e BE-së do të varet nga suksesi i qeverisë në zbatimin e reformave strukturore dhe rritjen e konkurrencës në raport me vendet e tjera të rajonit.
Ndërsa borxhi i përgjithshëm i qeverisë ndaj PBB-së (përfshirë garancitë) u rrit me pothuajse 9 pikë përqindjeje gjatë viteve 2019-21, duke kulmuar në 74.5% në vitin 2021 (që gjithsesi ishte nën mesataren prej 79.1% të vendeve me vlerësimin të njëjtë B1), raporti i borxhit publik ri-hyri në një trend të fortë zbritës në vitin 2022 dhe u zvogëlua me pothuajse 10 pikë përqindjeje në 64.6%, duke u ulur nën nivelin para-pandemik të vitit 2019.
Moody’s parashikon që raporti i borxhit publik në Shqipëri të vijojë të ulet.
Deri në vitin 2024, Moody’s parashikon që raporti i borxhit ndaj PBB-së të Shqipërisë të jetë 61.2%, që do jetë rreth 13.8 pikë përqindjeje më poshtë mesatares së vendeve me vlerësim të njëjtë B1.
o.j/dita
