Prej 4 ditësh, Vlora po vuan mungesën e ujit, për shkak të një defekti në një prej tubave kryesor të rrjetit, në të cilin siç deklaruan drejtuesit e Ujësjellësit, investimet e fundit i ka njohur në vitet 2009-2010.
Por në Ujësjellësin e qytetit bregdetar, përpara gati 5 vitesh janë bërë investime miliona euro.
Tre super tenderë me vlerë 18.2 mln euro me TVSH të ujësjellësit në Vlorë e Novoselë, janë fituar nga Bashkim Ulaj.
Tenderi i parë i zhvilluar nga Bashkia e Vlorës dhe Ujësjellësi është hapur më 20.05.2020 me objekt “Rikonstruksion dhe ndërtim i rrjetit të ujësjellësit në zonat Lungomare-Uji i Ftohtë-Shkolla e Marinës”, me vlerë kontrate 6.3 mln euro me TVSH.
Ky tender iu dha kompanisë “Gener 2 Sh.p.k” të Bashkim Ulajt dhe kompanisë “4 AM Sh.p.k”, me vlerë kontrate sa 99.3% e fondit limit, për të ndërtuar rrjetin e ujësjellësit me garanci 10-vjeçare funksionimi, ndërsa çdo defekt i mundshëm duhej të financohej dhe riparohej nga kompania private.
Kjo është një tjetër punë publike me vlerë të majme që e mori nga qeveria Rama oligarku i njohur për afrinë me familjen Berisha.
Ndërsa tenderi tjetër është hapur më 18.03.2021 dhe është fituar sërish nga kompania e botuesit dhe ndërtuesit Bashkim Ulaj.
Ky tender me vlerë 3.2 mln euro me TVSH ishte me afat punimesh 6 muaj dhe iu dha po kompanisë “Gener 2 Sh.p.k”, sa 99.6% e fondit limit dhe pa garë, gjithashtu me garanci 10-vjeçare funksionimi, ku çdo defekt i mundshëm duhej të riparohej me financim nga kompania private.
Po ashtu, ndërtuesi dhe botuesi Bashkim Ulaj, më 21 maj 2021, ka marrë edhe tenderin me vlerë 8.7 mln euro me TVSH, për rikonstruksionin e ujësjellësit të fshatrave të Njësisë Administrative Novoselë në Vlorë.
Të tre tenderët në faqen e Prokurimeve Publike rezultojnë me flamur të kuq.
Shqiptarja.Com
