Një 28-vjeçar në Durrës ka përfunduar në prangat e policisë, pasi akuzohet se vodhi çantën e një turisteje angleze, brenda së cilës kishte sende personale. Policia vendore bëri me dije se 28-vjeçari ishte me precedentë të theksuar kriminalë në fushën e vjedhjeve. Gjithashtu, ky shtetas ishte autor i tentativës për vjedhje nën kërcënimin e një mjeti prerës (thikë), në filialin e një banke të nivelit të dytë, ngjarje e ndodhur në lagjen nr. 4, Durrës, në vitin 2018. Mësohet se aksioni u krye menjëherë pasi i dyshuari u lokalizua në verandën e një lokali në bulevardin “Epidamn”, ku ndodhi edhe vjedhja e turistes britanike 42-vjeçare. Në cilësinë e provës materiale, u sekuestruan çanta e turistes angleze, me sendet personale brenda saj, si dhe një mjet prerës (thikë) që iu gjet shtetasit K. M. Dosja po hetohet më tej nga Prokuroria e Rrethit, me akuzën e ‘vjedhja me dhunë”.
