Për të 3 bashkitë ku do të kryhet votimi elektronik, Komisioni Qendror i Zgjedhjeve ka vendosur për printimin e plotë të të gjithë sasisë së fletëve të votimit.
Në diskutimet e zhvilluara nëse duheshin printuar, ose jo, e gjithë sasia e fletëve të votimit që do të përdoret në këto tre bashki, KQZ ka rënë dakord për prodhimin e sasive të plota të fletëve të votimit. Kështu do të printohet të gjitha fletët sipas numrit të zgjedhësve plus 2%, të cilat do të jenë si garanci për partitë, në rast se do të ndodhë që sistemi elektronik shfaq probleme.
“Duke qenë se jeni të gjithë dakord dhe do t’i mbetemi vendimmarrjes për prodhimin e sasive të plota të fletëve të votimit, pra numri i zgjedhësve plus 2%. Pra do bëjmë një ndryshim në vendim”, tha Ilirjan Celibashi.
Votimi elektronik për zgjedhjet vendore të 14 majit do të zhvillohet në 3 bashki, atë të Elbasanit, Kamzës dhe Vorës. Ky proces i cili garanton fshehtësinë e votës, do të sigurojë gjithashtu marrjen e një rezultati të shpejtë, brenda 30 minutave pasi është mbyllur procesi i votimit. Në Elbasan do të vendosen 3 zona ku do të kryhet votimi elektronik, në Kamëz do të jenë dy zona dhe në Vorë një zonë.
p.k\dita
