Gjykata e Lartë lë në fuqi dënimin me 30 vite burg për vrasësin serial, Julian Sinanaj dhe 5 të pandehurit e tjerë të “Bandës së tritolit” në Vlorë. I pandehuri rrëfeu krimet e tij në Shqipëri, të paktën 6 ngjarje të rënda, nga ekzekutimet, tek vendosja e eksplozivit në banesën e ish-deputetit të PD-së dhe tentativa e eliminimit fizik të një biznesmeni të njohur të karburanteve, me porosi e pagesë nga një konkurrent i tij. Për shkak të statusit si dëshmitar i drejtësisë, Sinani i ka shpëtuar burgimit të përjetshëm, teksa dyshohet edhe për krime të rënda në Greqi.
Dënimi me 30 vite burg për Sinanajn u dha në mars të vitit 2017 nga ish-Apeli për Krime të Rënda dhe ka mbetur në fuqi edhe për 5 të pandehurit e tjerë; Genis Mëhillaj 10 vite burg, Albin Mexhaj, 8 vite burg, biznesmeni Ilir Karçini me 5 vite burg, Ndriçim Gjokona me 8 vite burg, Marjon Mitro, me 8 vite burg.
Ndërkohë për Andon Mëhillajn, gjykata e Lartë pushoi çështjen ku ai ishte i dënuar me burgim të përjetshëm, pasi ndërroi jetë në qeli në vitin 2020. Sinanaj i përket të ashtuquajturës “Banda e Tritolit” në Vlorë si dhe autor i vrasjes së Sokol Veizit, Julian Metushajt, e Agron Çelës; tritoli në banesën e Ardian Kollozit, ish-kreut të PD-së në Vlorë, tritoli në automjetin e ish-perfektit Besnik Dervishi dhe vrasja e mbetur në tentativë ndaj biznesmenit të gazit.
