Sot në Gjykatën e Posaçme kundër Korrupsionit dhe Krimit të Organizuar është rishfaqur videoja që ka fiksuar momentin e vrasjes së Santiago Malkos, disa vite më parë në Tiranë. Pamjet e ekzekutimit të tij i kanë prekur familjarët e tij, më konkretisht nëna ka shpërthyer në lot duke shkaktuar ndërprerjen e seancës për disa minuta. Videoja u shfaq në procesin gjyqësor që po mbahet në GJKKO ndaj Ilir Selmanit dhe Elvis Gaçajt. Natën e vrasjes, të dy kanë lëvizur në zonë, para dhe pas ekzekutimit të Malkos.
Gjykata e Posaçme e Apelit për Korrupsion dhe Krimin e Organizuar ka dënuar me 25 vite burg Bledi Tetën për vrasjen e ish-policit Santiago Malko, ngjarje e ndodhur në gusht të vitit 2019. Teta u gjet fajtor nga trupa gjykuese si pjesëmarrës në ekzekutimin e Malkos mbrëmjen e 27 gushtit në rrugën “Xhanfize Keko” në Tiranë.
Për vrasjen e Malkos, prokuroria akuzon 8 persona, ku në krye të grupit janë dy vëllezërit Duka, Leonardi dhe Erlisi. Klani Duka, i akuzuar për vrasjen përbëhet nga: Leonard Duka, Erlis Duka, Ilir Selmani, Oltian Loga, Ervis Metani, Fatmir Hyseni, Dritan Agaj, Aleksandër Maxhaku dhe Xhoni Nica. Por, në pranga është vënë vetëm Teta dhe Ilir Selmani.
