Presidenti i Serbisë, Aleksandar Vuçiç, ka provuar të distancohet të mërkurën nga retorika fashiste e ministres së Administratës Shtetërore dhe Vetëqeverisjes Lokale, Snezhana Paunoviç, duke e cilësuar “të pakujdesshme” dhe “të papërgjegjshme” deklaratën e saj në të cilën promovohej spastrimi etnik i shqiptarëve në Kosovë.
Gjatë një prononcimi për gazetarët në Kiev të Ukrainës, kreu i shtetit serb theksoi se qëndrimi i ministres nuk përfaqëson politikën zyrtare të tij as të Qeverisë së Serbisë.
“Kjo deklaratë nuk pasqyron vullnetin dhe politikën e presidentit dhe qeverisë së Serbisë. Ne duhet të jemi të përgjegjshëm, politika jonë është dialogu, kompromisi, paqja dhe stabiliteti dhe kurrë spastrimi etnik, pikë”, deklaroi Vuçiçi sipas Danas.
Deklarata se në vitin 1998 do të kishte “spastruar etnikisht Kosovën” nëse do të ishte në vend të ish-presidentit fashist të Serbisë, Sllobodan Millosheviç, ka nxitur reagimin e opozitës serbe, zyrtarëve evropianë dhe institucioneve kosovare, derisa është shpallur person non grata nga Ministria e Punëve të Brendshme.
j.l./ dita
