Këtë të enjte, ambasadorja amerikane Yuri Kim është takuar me kryetaren e Gjykatës Kushtetuese, Holta Zaçaj, ku ka rikonfirmuar mbështetjen e SHBA-së për reformën në drejtësi.
Ambasadorja deklaroi se reforma në drejtësi është e rëndësishme për pavarësinë dhe integritetin e gjykatave, si një kusht gjithashtu edhe për anëtarësimin e Shqipërisë në BE.
“Sot takova Holta Zaçajn për ta uruar për zgjedhjen në krye të Gjykatës Kushtetuese. SHBA do të vazhdojë të mbështesë fuqishëm reformën në drejtësi në mënyrë që gjykatat të funksionojnë të pavarura dhe me integritet. Kjo është kërkesa e drejtë e qytetarëve, e nevojshme për të tërhequr më shumë investime dhe e nevojshme për anëtarësimin europian. I urojmë gjyqtares Zaçaj dhe të gjithë gjyqtarëve të tjerë mençuri dhe sukses në përmbushjen e detyrës”, shkruan Kim në rrjetin social Twitter.
Gjykata Kushtetuese zgjodhi më 20 shkurt Holta Zaçajn, në krye të këtij institucioni, duke zëvendësuar në këtë detyrë Vitore Tushën. Zaçaj arriti të siguronte 5 vota, duke u zgjedhur kështu kryetare e Kushtetueses për 3 vite.
p.k\dita
