Një tjetër rast i ‘foleve’ të mashtrimeve telefonike është goditur në Elbasan. Një person ra në pranga dhe 4 të tjerë u morën nën hetim, pas operacionit për goditjen e Call-Center ilegal. Në pranga ra administratori Mirsad Nokiçi, 26-vjeç, si dhe nisi hetimi për 4 operatorët. Nga veprimet hetimore ka rezultuar se këta 5 të rinj, nëpërmjet subjektit në fjalë, mashtronin të huajt. Baza ishte ngritur në lagjen ‘Sul Paprri’, në Elbasan. Ata i mashtronin të huajt për të investuar para në tregjet fiktive dhe bursa, duke u zhvatur paratë. Në ambientet e subjektit janë gjetur nga shërbimet e Policisë, 3 kompjutera, 1 lap-top, 2 USB dhe 6 aparate celulari, të cilat u sekuestruan në cilësinë e provës materiale, së bashku me një sasi të vogël lënde të dyshuar narkotike kanabis sativa, që iu gjet njërit prej operatorëve. Materialet procedurale i kaluan Prokurorisë Elbasan, për veprime të mëtejshme.
