Kryeministri Edi Rama mësohet se do të mbledhë më datë 11 shtator Asamblenë e Partisë Socialiste. Burime për mediat bëjnë me dije se tashmë është caktuar data se kur Rama do të prezantojë qeverinë e re, pas fitores së zgjedhjeve në 11 Maj, ku PS mori 83 deputetë.
2 javë para Asamblesë, kryeministri Edi Rama ka vijuar takimet lidhur me emrat që do të jene pjesë e ekzekutivit.
Gjatë ditës së djeshme, ai priti në zyrën e tij në Kryeministri Ministrin e Financave, Petrit Malajn, zv.kryeministren Belinda Balluku dhe Ministren e Sipërmarrjes, Delina Ibrahimaj. Po ashtu Rama është takuar në zyrën e tij edhe me biznesmenin Behgjet Pacolli.
Teksa të gjithë janë në pritje të emrave të përzgjedhur nga kreu i ekzekutivit, Presidenti Bajram Begaj do të duhet të dekretojë një datë për seancën e parë të parlamentit të ri.
Sipas kushtetutës, kreu i shtetit ka mundësi që brenda një harku kohor 10 ditor të thërrasë mbledhjen e parë, atë të konstitumit të parlamentit.
10 shtatori është data e parë se kur Begaj mund të thërrasë parlamentin, ndërsa afati i fundit është 20 shtatori.
Në mbledhjen e parë të parlamentit të ri zgjidhet një komision i përkohshëm për verifikimin e mandateve ku një e nga një ftohen deputetët të bëjnë betimin.
Më pas seanca vijon me zgjedhjen e kryetarit të ri të kuvendit, ku kandidati për kryetar propozohet nga të paktën 15 deputetë dhe zgjidhet pa debat dhe me votim të fshehtë me shumicën e votave.
j.l./ dita
