Ish-boksieri profesionist Fatjon Murati, dyshohet se ka pasur informacione se ndaj tij po përgatitej një atentat i mundshëm. Edhe pse nën masën e arrestit të shtëpisë të dhënë nga gjyqtarja Migena Laska para ngjarjes, 32-vjeçari duket se e thyente shpesh, duke bërë edhe udhëtime jashtë vendit, teka konfirmohet se udhëtimi i fundit është kthyer në arratisje. Rezulton se ditën e ngjarjes, më datën 12 Mars, ai ka kaluar në pikën e Morinës, në Kukës, me destinacion Prishtinën në Kosovë dhe më tej mendohet se ka zbritur në Turqi. Duke shfrytëzuar marrëveshjen e lëvizjeve pa kontroll në fundjavë, nuk është penguar për të kaluar kufirin më Kosovën.
Dyshimet e grupit hetimor e lidhin lëvizjen e Fatjon Muratit me të paktën dy personazhe, të cilët kanë lidhje shoqërore me 32-vjeçarin.
Ata janë Gentian Reçi dhe Indrit Dokle, të cilët sipas hetuesve, në mesditën e datës 12 Mars kanë lëvizur drejt Maqedonisë, ndërsa Murati ka lëvizur drejt Turqisë, pra vetëm pak orë para atentatit. Kujtojmë se edhe herën e fundit kur u arrestua, Murati ishte në një makinë të blinduar në zonën e “Astirit” në Tiranë, duke udhëtuar po me të njëjtët personazhe, Doklen dhe kunatin e tij Reçi. Pas zbutjes së masës së sigurisë, kanë qenë përsëri këta dy që i kanë dalë mbrojtje shokut të tyre, duke e fshehur dhe rrjedhimisht shpëtuar nga atentati vdekjeprurës.
Ndërkohë, vijojnë hetimet për zbardhjes e atentatit të “Don Boskos”, që tronditi kryeqytetin mbrëmjen e së dielës, me një të vrarë, banakierja e lokalit të Muratit dhe 5 të plagosur, mes tyre xhaxhai i tij dhe mbesa 10-vjeçare e viktimës, që janë jashtë rrezikut për jetën.
Grupi hetimor ka vijuar edhe këtë të martë me mbledhjen e kamerave të sigurisë në rrugën “Anastas Shundi”. Nga verifikimet e kryera deri tani ka rezultuar në një kamera sigurie, në orën 20:20, që ka pikasur makinën seria 5, me targa të huaja, e vjedhur në Durrës, e cila kalon në zonën e Qafë-Kasharit. Më pas kjo makinë është filmuar po nga e njëjta kamera, duke u larguar me shpejtësi në orën 20:50, ku sipas hetuesve kaq kohë i ka mjaftuar atentatorëve për të kryer krimin.
Mendohet se pranë lokalit duke vëzhguar për orë apo ditë të tëra, mund të ketë qenë ndonjë tjetër anëtar i grupit të atentatorëve, që ka urdhëruar apo orientuar ekzekutorët. Mjeti u gjet në fshatin Likmetaj të Durrësit, zona e Bubqit, i shkrumbuar, bashkë me 3 armë automatike brenda. Ekspertët shpresojnë që të zbulojnë ndonjë gjurmë biologjike apo daktiloskopike, që mund të çojë deri tek atentatorët, që sipas dëshmive të deritanishme, kanë qenë të maskuar.
Pista e parë e hetimit është hakmarrja nga grupi i biznesmenit të shumëkërkuar dhe zhdukur pa gjurmë prej 8 gushtit 2022, Ervis Martinaj, pasi Murati dyshohet se është një nga atentatorët e masakrës së Fushë-Krujës më 17 korrik të vitit të kaluar, ku u vranë Brilant Martinaj, kushëri i parë i bosit të lojërave të fatit dhe dy miqtë e tjerë të tij.
Murati është shoqëruar dhe marrë në pyetje në lidhje me këtë ngjarje, por mohoi përfshirjen, teksa kishte një urdhër-kërkimi ndaj tij për bazën e armatimeve në periferi të kryeqytetit, ku i dilte një gjurmë gishti në mjetin e të arrestuarit për këtë ngjarje. Murati u kap më 8 tetor 2022 së bashku me Doklen dhe Reçin në mjetin e blinduar dhe u ndalua, por pas katër muajsh është liruar me masë të butë sigurie.
Zbulohet se kush e shpëtoi dhe ndihmoi në arratisje ish-boksierin Fatjon Murati, vetëm pak orë para atentatit në “Don Bosko”
