Një teknologji e re dhe tepër e sofistikuar, e quajtur “Ghost Murmur”, u përdor nga CIA për të lokalizuar dhe shpëtuar një pilot amerikan në jug të Iranit, sipas një raportimi të publikuar nga New York Post.
Sipas burimeve të cituara, kjo teknologji sekrete është në gjendje të zbulojë “gjurmën” elektromagnetike të rrahjeve të zemrës së njeriut, duke përdorur magnetometri kuantike me rreze të gjatë. Më pas, të dhënat përpunohen nga inteligjenca artificiale për të ndarë sinjalin jetik nga “zhurma” e ambientit përreth.
Operacioni në fjalë shënon herën e parë që “Ghost Murmur” është përdorur në një mision real.
“Nëse zemra të rreh, do të të gjejmë”
“Është si të dëgjosh një zë në një stadium, vetëm se stadiumi është një shkretëtirë prej mijëra kilometrash katrorë. Në kushtet e duhura, nëse zemra jote rreh, ne do të të gjejmë”, deklaroi një burim me njohuri mbi këtë teknologji.
Sipas të njëjtit burim, “Ghost Murmur” është zhvilluar nga njësia sekrete “Skunk Works” e kompanisë Lockheed Martin dhe është testuar me sukses në helikopterë Black Hawk, me plane për përdorim të mundshëm edhe në avionët luftarakë F-35 në të ardhmen.
Dy ditë në arrati në territor armiqësor
Piloti amerikan, i njohur publikisht vetëm si “Dude 44 Bravo”, ishte fshehur në një zonë malore pasi avioni i tij F-15 u rrëzua në fundjavën e kaluar. Ai arriti të mbijetojë për dy ditë në kushte të vështira, ndërsa kërkohej nga forcat iraniane dhe ishte shpallur në kërkim nga autoritetet në Teheran.
Emri “Ghost Murmur” nuk është rastësor: “Murmur” është një term mjekësor që lidhet me ritmin e zemrës, ndërsa “Ghost” i referohet gjetjes së një personi që, praktikisht, konsiderohet i zhdukur.
Kushtet ideale për teknologjinë
Burimet theksojnë se zona ku ndodhej piloti ofronte kushte pothuajse ideale për përdorimin e kësaj teknologjie: ndërhyrje të ulëta elektromagnetike, mungesë sinjalesh të tjera njerëzore dhe kontrast të lartë termik gjatë natës mes trupit të njeriut dhe terrenit të shkretëtirës.
“Në kushte normale, ky sinjal është aq i dobët sa mund të matet vetëm në ambiente spitalore, me sensorë shumë pranë trupit. Por përparimet në magnetometrinë kuantike kanë bërë të mundur zbulimin e tij në distanca shumë më të mëdha”, shpjegoi burimi.
Kombinimi me teknologji të tjera
Piloti kishte aktivizuar gjithashtu një pajisje sinjalizuese të vendndodhjes (Combat Survivor Evader Locator) të prodhuar nga Boeing. Megjithatë, pozicioni i tij i saktë mbetej i paqartë për ekipet e kërkim-shpëtimit.
Në këtë pikë ndërhyri “Ghost Murmur”, duke ndihmuar në identifikimin e saktë të vendndodhjes së tij. Sipas burimeve, të dyja teknologjitë ishin vendimtare për suksesin e operacionit.
“Për të dërguar sinjalin, ai duhej të dilte në një zonë të hapur. Nuk ishte aq i rëndësishëm vetë sinjali, sa fakti që u detyrua të ekspozohej për ta transmetuar atë”, përfundoi burimi.
j.l./ dita
