Dje, në Ministrinë e Drejtësisë, në një mbledhje maratonë të Asamblesë Zgjedhore, përmbaruesit privatë rizgjodhën përsëri për drejtimin e Dhomës, kreun aktual të saj, Tedi Malaveci.
Mbledhja u zhvillua në një atmosferë të nxehtë debatesh, në prani të 123 përmbaruesve, të cilët zgjodhën organet drejtuese të organizatës së tyre për 4 vitet e ardhshme.
Me votim të fshehtë, u rikonfirmua si kryetar i Dhomës z.Malaveci, i cili mori 74 vota, përballë 47 votave që morën tre kandidatët e tjerë së bashku.
Ministria e Drejtësisë, monitoroi nga afër procesin zgjedhor për zgjedhjen e kreut të Dhomës së Përmbaruesve, proces që zgjati disa orë për shkak të diskutimeve dhe debateve, që shoqëruan Asamblenë e ditës së shtunë.
Malaveci, në drejtimin disavjeçar të Dhomës së Përmbaruesve, njihet për mbajtjen e një qendrimi të fortë ndaj disa institucioneve shtetërore, në mbrojtje të tarifave përmbarimore, përfshirë dhe vetë Ministrinë e Drejtësisë, të cilën e ka paditur në vitin 2018.
I njohur është edhe qendrimi i tij ndaj shoqërive të mikrokreditit, bërë publik nëpërmjet disa deklaratave dhe komunikatave për media.
i.b. / dita
