Mbyllet orari zyrtar i votimit për përsëritjen e zgjedhjeve në Rrogozhinë. Qyteti votoi sërish dje për zgjedhjen e kryetarit të bashkisë! Rreth 33 mijë qytetarë janë thirrur në votime. Pas shpalljes të pavlefshme të zgjedhjeve të 14 majit, 2 kandidatët Edison Memolla i PS e Shkëlqim Hoxha i koalicionit “Bashkë Fitojmë”, patën përplasje të dytë, për t’u besuar nga qytetarët në krye të bashkisë.
Pjesëmarrja deri në orën 18:00 është 35.5%, më e lartë se në zgjedhjet e 14 majit ku në këtë orë ishte 32.12%. Pas përfundimit të procesit të votimit ka nisur transportimi i kutive të votimit të cilat do të numërohen në ambientet e KZAZ 43.
Procesi i votimit deri tani ka vijuar i qetë, ndërsa raportohet për një pjesëmarrje të lartë në votime. Por megjithatë një incident është raportuar në Qendrën e Votimit nr 22-23, pasi votimi u ndërpre për disa minuta për shkak të fotografimit të votës. Në lidhje me këtë ka reaguar edhe kreu i KQZ-së Ilirjan Celibashi, i cili nënvizoi se fotografimi i votës përbën shkelje të rëndë penale.Ndërkohë kandidati i Bashkë Fitojmë ka thyer heshtjen zgjedhore, duke hedhur akuza në drejtim të kryebashkiakut të Tiranës Erion Veliaj. Kjo ka sjellë edhe reagimin e KQZ-së që i ka kërkuar kandidatëve të partive politike, që të evitojnë thirrjet politike me përmbajtje elektorale, pasi cenojnë procesin zgjedhor.
Nga ana e Partisë Socialiste situata duket tejet e qetë, ku në terren është vetëm deputeti i zonës Etjen Xhafaj, ndërsa mësohet se drejtuesi politik i qarkut Tiranë, Erion Veliaj po e ndjek procesin nga selia e PS në Tiranë.
Ajo që vihet re është një pjesëmarrje më lartë e numrit të votuesve krahasuar me zgjedhjet që u mbajtën më 14 maji. Sipas KQZ-së deri në orën 13 kanë votuar 29.38% e qytetarëve. Ndërkohë më 14 maj, në po të njëjtën orë kishin votuar 24.64% e qytetarëve.
