Anëtarja e kryesisë së PS, Mimi Kodheli beson se forca e saj politike do t’i fitojë zgjedhjet, sepse di të rinovojë veten me ide, me njerëz dhe programe. Me 20 vite eksperiencë në PS , Kodheli beson se kryesia do të marrë vendime të drejta për kandidatët e bashkive.
“Ne do të vazhdojmë të qëndrojmë gjatë në pushtet, sepse jemi të duhurit dhe më të mirët në treg”, tha ajo gjatë një interviste televizive.
E pyetur vecanërisht për Tiranën, Kodheli tha se në raport me kundërshtarin politik, Tirana është shumë pozitive si në qeverisjen qendrore, dhe atë lokale. Ajo vlerësoi si dy faktorë të rëndësishëm, mbështetjen e qeverisë dhe drejtimin e duhur nga kryebashkiaku Veliaj. Ajo iu përgjigj edhe pyetjes nëse është ftohur me Edi Ramën, pasi nuk u vendos në listë fituese në zgjedhjet e fundit.
“Kemi 20 vite që punojmë bashkë. Disa periudha më pranë, disa më larg, por jemi aty e ndiejmë dhe e shikojmë që jemi e gjithmonë bashkëpunëtorë. Në kohën e hartimit të listave ka pasur një diskutim. Po jua them siç ia thashë kryeministrit Rama: Kam qenë në krye të listës ose në 3-shen e parë te listës.
E kam për nder të jem edhe në fund të listës së PS. Unë i shërbej vendit pavarësisht nëse jam nr. 1 apo 35, për sa kohë jam zgjedhur ta bëj këtë punë. Do ta bëj edhe kur të jem 35-a dhe do ta bëj sot, kur jam akoma në piacë, në krye të punëve të politikës”, u shpreh Kodheli.
m.b./dita
