Zhdukjet misterioze të personave me të kaluar kriminale dhe skeda të bollshme për Policinë e Shtetit po kthehen në të zakonshme vitet e fundit. Dy persona të tjerë me precedentë të rëndë penalë, janë zhdukur pothuajse në të njëjtën kohë në Sarandë, duke ngritur dyshime të forta për një rrëmbim të mundshëm me qëllim mbulimin e ndonjë ngjarje të rëndë si dëshmitarë apo autorë (prerja e fundeve të lira), ose inskenim. Burime zyrtare thanë se prej ditësh kanë humbur gjurmët me familjarët shtetasit Leonard Theodhori, 46 vjeç, banues në fshatin Çukë, ish i akuzuar si pjesëmarrës në masakrën e Qafë-Gjashtës në vitin 1997, ku u vra një oficer policie dhe Fatmir Sulovari, alias Fatmir Krasniqi, 46 vjeç, banues po në Sarandë. Policia sqaroi se ka nisur verifikimet dhe mbledhjen e informacioneve, duke bërë këqyrje kamerash sigurie, e kontrolle të ndryshme në ambiente. Ende nuk ka një pistë hetimi lidhur me zhdukjen e dy personave, që besohet se kanë pasur edhe njohje mes tyre. Edhe familjarët janë vënë në kërkim. Policia dyshon se nëse nuk është një vetëzhdukje e dy personave, në rrethana e motive të paqarta, atëherë besohet për një rrëmbim të mundshëm në konflikte për ngjarje të mëparshme, hakmarrje apo për të zhdukur prova për një krim tjetër ku kanë marrë pjesë. Por hetimet e thelluara do të zbulojnë të vërtetën, teksa është përfshirë edhe Prokuroria.
Kush janë dy personat e zhdukur
dhe skedat e tyre ‘të bollshme’
I pari është Leonard Theodhori, 46 vjeç, i njohur si “Koçole”. I dënuar disa herë për vepra të ndryshme penale. I dyshuar dhe si pjesëmarrës në “Masakrën e Qafë-Gjashtës”, në vitin 1997, ku u vra oficeri i policisë Gjergj Mehmeti. Në vitin 2003 ka qenë prezent ne automjetin që drejtohej nga Andrea Gjini, para se ky i fundit të vriste biznesmenin Jaho Bajo. I arrestuar po atë vit për “moskallëzim krimi”, lidhur me një ngjarje tjetër të kryer nga Gjini. I arrestuar më pas për “vjedhje” e “mashtrim”. Përdorues i lëndëve narkotike dhe i dyshuar si i përfshirë në trafik lëndësh narkotike. Me skedën e tij të bollshme, policia dyshon fortë se bëhet fjalë për një hakmarrje apo larje hesapesh të mundshme, nëse Theollori nuk e ka inskenuar humbjen e vetes. Precedentët e tij të shumtë i çojnë ekspertët e kriminalistikës drejt dyshimit për një eliminim të mundshëm dëshmitari në krim të rëndë, ndaj do verifikohen të gjitha ngjarjet më të bujshme të javëve të fundit dhe koha e zhdukjes. I dyti është Fatmir Sulovari, alias Fatmir Krasniqi, 46 vjeç. I dënuar më parë për “armëmbajtje pa leje” dhe “plagosja e lehtë me dashje”. I arrestuar në muajin prill 2022 ne Lushnjë, pasi në mjetin e tij “X5”, u gjet një sasi kanabis sativa, e ndarë në doza dhe gati për shitje.
