Qeveria zvicerane njoftoi të hënën se ka vendosur të ngrijë çdo pasuri të mbajtur në Zvicër nga presidenti i arrestuar i Venezuelës, Nicolas Maduro, ose bashkëpunëtorët e tij, “me efekt të menjëhershëm”.
Berna tha se vendimi u mor pasi Maduro u kap në Karakas në një operacion të befasishëm ushtarak amerikan dhe u dërgua në Nju Jork për t’u përballur me akuza për trafik narkotikësh.
Duke e përshkruar situatën si “të paqëndrueshme”, qeveria zvicerane tha në një deklaratë se synon “të sigurojë që çdo pasuri e përfituar në mënyrë të paligjshme të mos mund të transferohet jashtë Zvicrës në situatën aktuale”.
“Për këtë arsye, si masë paraprake, ka vendosur të ngrijë çdo pasuri të mbajtur në Zvicër nga Maduro dhe persona të tjerë të lidhur me të. Ngrirja e pasurive hyn në fuqi sot me efekt të menjëhershëm dhe do të mbetet e vlefshme për katër vjet deri në një njoftim të mëtejshëm”, thuhet në deklaratë.
Qeveria shtoi se “nëse procedurat e ardhshme ligjore zbulojnë se fondet janë përfituar në mënyrë të paligjshme, Zvicra do të përpiqet të sigurojë që ato ti përfitojë populli venezuelian”.
“Ngrirja e pasurive nuk prek asnjë anëtar të qeverisë aktuale të Venezuelës”, theksohet në deklaratë. Masa, e vendosur në bazë të Ligjit Federal të Zvicrës për Ngrirjen dhe Kthimin e Pasurive të Paligjshme të Mbajtura nga Persona të Ekspozuar Politikisht të Huaj, i shtohet sanksioneve ekzistuese ndaj Venezuelës në fuqi që nga viti 2018, të cilat përfshijnë gjithashtu ngrirje pasurish.
Ngrirjet e reja të pasurive “synojnë individë që më parë nuk ishin sanksionuar në Zvicër”, thuhet më tej.
Qeveria zvicerane tha se po monitoron nga afër situatën në zhvillim në Venezuelë dhe bëri thirrje “për de-përshkallëzim, përmbajtje dhe respektim të ligjit ndërkombëtar, përfshirë ndalimin e përdorimit të forcës dhe parimin e respektimit të integritetit territorial”.
Ajo theksoi gjithashtu ofertat e përsëritura të Zvicrës për të vënë në dispozicion “shërbimet e saj të mira për të gjitha palët, me qëllim gjetjen e një zgjidhjeje paqësore të situatës”.
Berna tha se “arsyet që qëndrojnë pas rënies nga pushteti të Maduros nuk luajnë rol vendimtar në ngrirjen e pasurive… as çështja nëse rënia nga pushteti ka ndodhur ligjërisht apo në shkelje të ligjit ndërkombëtar”.
Faktori vendimtar, sipas saj, është se “ka ndodhur një rënie nga pushteti dhe tani ekziston mundësia që vendi i origjinës të nisë në të ardhmen procedura ligjore në lidhje me pasuri të përfituara në mënyrë të paligjshme”.
j.l./ dita
