Një burrë nga Misuri në SHBA, vdiq nga vibrioza, pasi hëngri goca deti të papërpunuara, që bleu nga një stendë, thanë autoritetet e Departamentit të Shëndetit Publik të Qarkut. Vdekja erdhi një javë pas konsumimit, teksa pati simptoma kritike dhe u shtrua në spital, por pa sukses.
Burri i bleu gocat e detit nga The Fruit Stand & Seafood në Mançester, Misuri. Zyrtarët shëndetësorë të qarkut po i bëjnë thirrje kujtdo që së fundi ka blerë goca deti nga tregu që t’i asgjësojë ato, ndërsa hetuesit po punojnë për të përcaktuar burimin e gocave deti.
“Nuk ka asnjë provë që biznesi ka bërë ndonjë gjë për të kontaminuar gocat e detit, të cilat ka të ngjarë të ishin kontaminuara tashmë kur institucioni i mori ato”, thanë hetuesit e departamentit të shëndetësisë në një deklaratë për shtyp.
Zyrtarët shtuan se të gjitha gocat e detit të mbetura në treg u bllokuan nga departamenti i shëndetësisë.
Departamenti vuri në dukje se sëmundja e rëndë dhe vdekja nga vibrioza janë të rralla dhe zakonisht ndodhin te njerëzit me një sistem imunitar të dobësuar.
Qendrat për Kontrollin dhe Parandalimin e Sëmundjeve thanë se njerëzit mund të zvogëlojnë rrezikun e tyre të vibriozës, duke ndjekur këshillat.
