Rreth 14 mijë persona në javë i drejtohen spitaleve me grip dhe viroza të stinës. Sipas ekspertëve të ISHP, rastet janë në rënie. Në fund të muajit janar kur ishte dhe piku i gripit, në javë pati deri në 18 mijë të prekur.
“Trendi ka filluar që të bjerë dhe besoj deri nga mesi apo fundi i marsit numri do ulet më shumë.”
Pacientët paraqiten kryesisht me infeksione në rrugët e sipërme respiratore. Fëmijët janë më të prekurit nga bajamet, temperatura apo dhimbja e veshëve.
“Janë paraqitur më tepër raste në moshat pediatrike, ndoshta se një pjesë e tyre janë të pavaksinuar.”
Këtë vit gripi u shfaq me simptoma të rënda, por së fundmi ky agresivitet ka rënë.
“Agresiviteti tani ka rënë, siç ka rënë dhe numri i rasteve, fatmirësisht nuk kemi pasur raste vdekje, sepse grupet e riskut janë vaksinuar.”
Megjithëse rastet janë në ulje, ende jemi në sezon gripi, prandaj ekspertët këshillojnë të tregohemi të kujdesshëm.
o.j/dita
