141 mijë punonjës deklarojnë të ardhurat, ulet pragu, afat deri në 31 mars

Deklarimi i të ardhurave vjetore do të jetë detyrim për më shumë punonjës këtë vit për shkak të uljes së pragut.

Për Drejtorinë e Tatimeve, janë rreth 141 mijë individë të cilët duhet të plotësojnë formularin, një pjesë të cilëve janë të dypunësuar dhe të tjerë kanë të ardhura bruto nga puna mbi 1.2 mln lekë në vit.

Për 2023 kur pragu ishte 2 mln lekë, DIVA u plotësua nga 74 mijë individë, përkatësisht nga 24 000 individë me një punë dhe 50 mijë të dypunësuar.

Pra, këtë viti parashikohet që deklarimet nga individët e rinj të shtohen në numër rreth 67,000.

Këtë vit data e fundit për të cilën kërkohet deklarim është 31 marsi, në mënyrë që të mos penalizohen me gjobën 3 mijë lekë.

Për ndryshimet e DIVA-s 2024, risi tjetër do të jetë që edhe individët që kanë realizuar të ardhura të patatuara më shumë se 50 mijë lekë në vit nga çdo kategori tjetër të ardhure, por të cilat nuk i nënshtrohen mbajtjes së tatimit përfundimtar në burim, kanë detyrimin e deklarimit, pavarësisht totalit vjetor të të ardhurave bruto të realizuara.

j.l./ dita