32-vjeçari që humbi jetën pati kriza epilepsie në komisariat? AMP dhe Trauma me versione të ndryshme

32-vjeçari Lear Kurti është ndaluar në “Don Bosko” në kryeqytet mbrëmjen e djeshme, pak para mesnate rreth orës 23:30, kur patrulla e Policisë përgjegjëse për komisariatin e Policisë nr.3 i ka bërë thirrje për të ndaluar.

Sapo pa policinë, 32-vjeçari zgjodhi të largohej. Pasi u ndoq për disa metra me vrap, ai u neutralizua dhe u bë shoqërimi i tij. Varianti policor tregon dinamikën e deritanishme të ngjarjes.

Lear Kurti vuante nga epilepsia. Momenti i ndalimit nga policia është filmuar nga kamerat e sigurisë kur shihet i riu i vetëm. Pasi është prangosur, patrulla ka bërë edhe shoqërimin e tij për në Komisariatin nr.3. Me mbërritjen në komisariatin nr.3, ai ka hyrë në korridor, ku i kanë nisur edhe problemet shëndetësore. Kurti ka nisur të dridhet sapo hyrë në komisariat dhe në këtë moment efektivët e pranishëm sipas dëshmive policore janë përpjekur ti japin ndihmën e parëdhe kanë njoftuar shërbimin e urgjencës.

Prania e tij në ambientet e komisariatit nr.3 nuk ka zgjatur më shumë se 5 minuta. Gjatë kësaj kohe, në ambientet e jashtme të Komisariatit kanë kaluar edhe disa nga miqtë e tij për të pyetur policinë se pse u ndalua Kurti. 5 minutat e pritjes në Korridorin e Komisariatit nr.3 tregojnë të riun që është në gjendje të rëndë shëndetësore teksa dridhet dhe i dalin sekrecione nga goja, shkruan Dosja.al.

Më pas Kurti është çuar në spitalin e Traumës. Spitali i Traumës deklaron se i riu ka mbërritur i vdekur në spital ndërsa Agjencia e Mbikqyrjes Policore deklaron se “Gjatë shoqërimit të tij, ky shtetas ka shfaqur probleme shendetësore sapo ka mbërritur në ambientet e Komisariatit. Menjëherë është kërkuar ndihma e shërbimit të Urgjencës dhe për shkak se situata shëndetësore e tij është rënduar, ky shtetas është dërguar me mjetet e Policisë në Spitalin e Traumës, ku edhe ka ndërruar jetë.”

Por spitali i Traumës në një prononcim për ABC News pretendon se ai ka mbërritur i vdekur kur ka shkuar në spital dhe nuk ka patur më mundësi që të bëhej diçka për të.

j.l./ dita