80 eurodeputetë letër KE-së: Të hiqen tarifat celulare roaming me vendet e Ballkanit Perëndimor

Më shumë se 80 deputetë evropianë i kanë kërkuar Komisionit Evropian që të heqë tarifat e roaming për vendet e Ballkanit Perëndimor në një letër dërguar Presidentes Ursula von der Leyen.

Balkaninsight shkruan se një grup prej më shumë se 80 anëtarësh të Parlamentit Evropian i ka kërkuar Komisionit Evropian që të përfshijë vendet e Ballkanit Perëndimor në Zonën e Roamingut të Lirë.

Në një letër dërguar presidentes së Komisionit Ursula von der Leyen, eurodeputetët thonë se shtetet e Ballkanit Perëndimor janë partnere të besueshme të Bashkimit Evropian dhe se me rekomandimin e Komisionit Evropian për t’i dhënë statusin e kandidatit Bosnjë dhe Hercegovinës, një tjetër moment historik në politikën e zgjerimit të unionit është arritur.

“Prandaj ne i bëjmë thirrje Komisionit Evropian që të paraqesë shpejt një udhërrëfyes të qartë që synon t’i japë fund tarifave shtesë të roaming-ut midis Bashkimit Evropian dhe Ballkanit Perëndimor, duke zgjeruar kështu Zonën Evropiane të Roamingut të Lirë për të mirën e qytetarëve evropianë. Koha për të vepruar është tani”, thuhet në letër.

Deputetët thonë se kjo lëvizje duhet të vijë pas fjalimit të Von der Leyen në Parlamentin Evropian më 14 shtator, kur ajo u zotua të sillte Ukrainën në zonën evropiane të roamingut të lirë.

“Ndërsa ju keni mbështetjen tonë të plotë për këtë përpjekje, ne dëshirojmë të tërheqim vëmendjen tuaj në një rajon tjetër evropian që meriton të përfitojë nga roaming falas, përkatësisht vendet e Ballkanit Perëndimor.”

Thomas Waitz, eurodeputet dhe bashkëkryetar i Partisë së Gjelbër Evropiane, tha se Komisioni duhet të kontribuojë në një integrim më të fortë duke krijuar një zonë evropiane të roamingut të lirë që përfshin Ballkanin Perëndimor.

“Ne kemi nevojë urgjente për një integrim më të ngushtë të vendeve të Ballkanit Perëndimor dhe BE-së, dhe një hap për këtë do të ishte rrëzimi i barrierave në roaming”, tha Waitz.

“Kjo jo vetëm që do të ndihmojë në mbylljen e hendekut drejt BE-së, por gjithashtu do të pranojë pengesat e përditshme të qytetarëve të Ballkanit Perëndimor që jetojnë dhe punojnë në BE, shpesh larg familjeve të tyre, për shkak të tarifave të shtrenjta të roaming”, shtoi ai.

Në vitin 2017, Bashkimi Evropian njoftoi se po shqyrtonte uljen e tarifave të roaming për Ballkanin Perëndimor, pas thirrjeve nga vendet kandidate për të hequr tarifat. Që nga korriku i vitit të kaluar, gjashtë vende të Ballkanit Perëndimor hoqën tarifat e roaming-ut në përputhje me Marrëveshjen Rajonale të Roaming-ut të nënshkruar në vitin 2019 në Samitin e dytë Dixhital të Ballkanit Perëndimor në Beograd.

j.l./ dita