Komisioni i Pavarur i Kualifikimit shpalli vendimin për shkarkimin nga detyra të gjyqtarit të Gjykatës së Korçës, Besnik Shehu. Vendimi u mor në mënyrë unanime nga trupa e KPK-së, e kryesuar nga Lulzim Hamitaj, me relatore Valbona Sanxhaktari dhe anëtare Genta Tafa Bungo. Gjatë shpalljes së vendimit, kryesuesi Hamitaj sqaroi se nuk ishte pranuar kërkesa e subjektit për çeljen e hetimit administrativ, për pastërtinë e figurës dhe profesionalizmin. Gjatë seancës dëgjimore më 3 prill, Shehu dha shpjegime lidhur me barrën e provës për pasurinë, kriterin e vetëm për të cilin ishte përmbyllur hetimi administrativ paraprak.
Komisioni konstatoi bilanc negativ në vlerën 12,3 milionë lekë për pasurinë e gjyqtarit Shehu, si dhe ngriti dyshime për një transaksion fiktiv me qëllim justifikimin e burimeve të ligjshme, në krijimin e pasurive dhe mbulimin e shpenzimeve. Shehu pretendoi se me provat dhe shpjegimet e paraqitura e kishte përmbysur barrën e provës dhe bilancin negativ përgjatë viteve dhe kërkoi çeljen e hetimit në dy kriteret e tjerë të rivlerësimit kalimtar, kërkesë që u rrëzua. Besnik Shehu e filloi karrierën në sistemin e drejtësisë në vitin 1995 dhe punoi prej më shumë se dy dekadash si gjyqtar pranë Gjykatës së Rrethit Gjyqësor Korçë. Tashmë magjistrati ka edhe ‘shansin’ e apelimit në KPA, për të mbajtur më tej togën e zezë, para se të përjashtohet me formë të prerë për 15 vitet e ardhshme.
