Të gjithë pyesin dhe kanë dilemën nëse Rusia do përshkallëzojë përplasjen e saj me Perëndimin deri në përdorimin e armëve bërthamore.
Janush Bugajski, ekspert dhe analist për çështjet e Ballkanit, i cili është gjithashtu person non grata në Rusi, shkruan në një analizë për gazetën DITA nga Uashingtoni se rusët nuk do arrijnë deri në këtë pikë, pikërisht sepse elita e tyre është shumë e kamur dhe dëshiron ta ruajë shijen e jetës së mirë që të jep pasuria dhe luksi.
Ja si shprehet Bugajski në shkrimin e tij në DITA:
“Ndonëse mundësia kërcënuese e një lufte bërthamore ngjall frikë në mesin e zyrtarëve perëndimorë, duhet kuptuar se liderët e rusë nuk do të bënin vetëvrasje duke i përdorur armët bërthamore kundër NATO-s.
Pasi kjo do sillte sulme bërthamore edhe nga NATO.
Dhe këto sulme do të zhduknin të gjitha qytetet kryesore të Rusisë nga faqja e dheut.
Por ashtu si elita sovjetike dikur, edhe klika aktuale e zyrtarëve të korruptuar rusë ka për qëllim final të mbijetojë dhe të gëzojë pasuritë e mëdha që kanë
Ata nuk do shkojnë drejt një lufte bërthamore sepse në fund do duan të mbrojnë të ardhmen e vet politike dhe pasurinë e tyre – shkruan Bugajski.
Por analisti mendon se Europa gjithsesi është e papërgatitur për një luftë jo bërthamore me Rusinë, duke përmendur edhe mesazhin që jep hapja e bazës së Kuçovës në Shqipëri.
“Europa vijon të jetë e papërgatitur dhe e keqpajisur ushtarakisht” – shkruan ai dhe shton:
“Një rrezik domethënës, që po shfaqet në horizont është hezitimi i mundshëm i Uashingtonit për të ndërhyrë në rast se Rusia sulmon ushtarakisht disa nga territoret e NATO-s.
Prandaj, vendosja e forcave dhe bazave amerikane përgjatë frontit lindor të NATO-s, që nga Estonia e Polonia deri në Rumani e Shqipëri është e rëndësishme. Ajo tregon angazhimin e SHBA-ve.
Uashingtoni e di se një luftë e drejtpërdrejtë SHBA-Rusi mund të shmanget, vetëm nëse, përgjatë muajve të ardhshëm, Ukraina armatoset plotësisht.
Në të njëjtën kohë, SHBA dhe BE kanë ekonomi dhe burime shumë më të mëdha se Rusia.
Pikëpyetja e vetme është vullneti dhe vendosmëria e liderëve të Aleancës për t’i siguruar Ukrainës armë dhe municione…”
Analiza e plotë botuar sot në DITA mund të lexohet duke klikuar KËTU
