Vizitën e tij dy ditore në Serbi, kryeministri i Malit të Zi, Dritan Abazoviç, e ka cilësuar një hap përpara drejt zgjidhjes së çështjeve të pazgjidhura, por sipas tij, këto çështje nuk mund të zgjidhen brenda natës.
Këto çështje përfshijnë Marrëveshjen Themelore, teksti i së cilës është publikuar pak para vizitës së Abazoviç-it në Serbi, të cilën Mali i Zi duhet ta nënshkruajë me Kishën Ortodokse Serbe.
Kryeministri malazez deklaroi se shteti do të trajtojë të gjitha bashkësitë fetare në mënyrë të barabartë siç e parasheh Kushtetuta.
“Për ne është e rëndësishme vetëm një gjë – që gjithçka të jetë në përputhje me Kushtetutën dhe ligjin dhe se të gjitha bashkësitë fetare kanë trajtim identik”, deklaroi Abazoviç, transmeton gazeta malazeze Vijesti.
I pyetur nga gazetarët se a ka gjasë të bie Qeveria shkaku i kësaj marrëveshjeje, Abazoviç tha se merret ekskluzivisht me interesin shtetëror.
Ai thekson se marrëveshjen themelore do ta nënshkruajë në Mal të Zi, në një afat që ende nuk është arritur.
“Ne nuk e kemi specifikuar, kemi pasur një takim shumë korrekt. Duhet të kryhen procedurat formale dhe më pas, do të caktojmë datën”, tha Abazoviç.
Kryeministri malazez beson se e ka arritur qëllimin e vizitës në Beograd që ishte “ngrohja” e marrëdhënieve me Serbinë.
“Nuk mund të presësh që vetura tipit golf të ecë me shpejtësinë e Formula 1, sepse nuk e ka atë motor. Tendenca jonë është që i gjithë rajoni të bëhet Formula 1, por në këtë moment mund të mos jetë as golf”.
Sa i përket nismës së Ballkanit të Hapur dhe anëtarësimit të mundshëm të Malit të Zi, Abazoviç theksoi se për këtë është diskutuar dhe është formuar një grup pune që përfshin disa ministri.
Ai potencon se të gjitha përfitimet duhet t’u sqarohen qytetarëve dhe thotë se kjo është një iniciativë ekonomike.
“Nëse bëhet fjalë që Ballkanin e Hapur është në kundërshtim me Procesin e Berlinit – nuk është. Ne jemi pro që Ballkani i Hapur të na ndihmojë të jemi ekonomikisht konkurrues me njëri-tjetrin”.
a.m/dita
