Një i dënuar me 4,5 vite burgim për akuzën e ngacmimit seksual të një 13-vjeçareje, është arrestuar dje nga Policia e Beratit. Në pranga ra i kërkuari Ajlon Pasho, 35 vjeç, që sipas informacioneve po fshihej në zonën e Dimalit. I riu cilësohej si “tmerri” në zonën e Sarandës, për abuzim seksual me të mitura dhe përndjekje. I kërkuari është vënë në pranga pasi ishte dënuar në mungesë nga Gjykata e Sarandës dhe ishte i skeduar si person problematik dhe pedofil. 35-vjeçari është vënë në pranga në Dimal, në banesën e një të afërmi të tij, ku fshihej në mënyrë që të mos vuante dënimin.
Në vitin 2018, në qytetin e Sarandës, Aljon Pasho akuzohet se ka përndjekur një të mitur 13 vjeçe dhe më pas ka kryer marrëdhënie seksuale me të, pa dëshirë dhe duke e kërcënuar, akuzë që ai s’e ka pranuar dhe është arratisur. Veprimet e mëtejshme procedurale për këtë shtetas do të kryhen nga Komisariati i Policisë Sarandë.
