Afera CEZ-DIA dhe lobimi amerikan, GJKKO kalon për gjykim Metën, Kryemadhin dhe tre të tjerë! Ish-deputetja: Gjyq politik

Ilir Meta dhe Monika Kryemadhi akuzohen për korrupsion, pastrim parash dhe fshehje pasurie. Të pandehur janë edhe Pirro Xhixho, Ema Çoku dhe Fatime Kryemadhi.

Pas gati 8 muajsh seancë paraprake, GJKKO ka vendosur të kalojë për gjykim dosjen ndaj ish-presidentit Ilir Meta, ish-bashkëshortes së tij Monika Kryemadhi, nënën e kësaj të fundit Fatime Kryemadhi, Pirro Xhixhon dhe Ema Çokun, në kuadër të hetimit për korrupsion, pastrim parash dhe fshehje pasurie për aferën CEZ-DIA dhe lobimin e LSI në SHBA.

Tre prej të pandehurve, Xhixho, nëna e Kryemadhit dhe mikesha e saj Çoku kanë bërë kërkesë për gjykim të shkurtuar, ndërsa ish-çifti Meta-Kryemadhi kërkojnë gjykim me procedurë të zakonshme. Gjyqi ndaj 5 të pandehurve do të nisë pasi të zgjidhet treshja e gjyqtarëve relatorë, ndërsa gjyqtarja e seancës paraprake Irena Gjoka rrëzoi të gjitha kërkesat për pavlefshmëri dhe papërdorshmëri të provave.

SPAK i akuzon Metën dhe Kryemadhin për korrupsion, pastrim parash dhe fshehje pasurie dhe sipas hetimeve të nisura që prej vitit 2019, ish-çifti duke shfrytëzuar pushtetin dhe influencën politike kanë favorizuar biznese të caktuara kundrejt përfitimeve monetare. Xhixho, babai i zv. presidentes aktuale të PL-së Erisa Xhixho, akuzohet për korrupsion, ndërsa Fatime Kryemadhi dhe Ema Çoku për pastrim parash.

Meta, i vetmi prej 5 të pandehurve që ndodhet në qeli prej tetorit 202, ishte vetë i pranishëm në seancë, ndërsa ish-bashkëshortja e tij, Kryemadhi pas vendimit të GJKKO hodhi akuza për një gjyq politik. Sipas saj, gjyqtarja Gjoka e mori vendimin për kalimin e dosjes për gjykim nën presion, pasi GJKKO bën afërmendsh atë çfarë kërkon SPAK. Ish-deputetja tha se vetë gjyqtarja pranoi se për 90% të akuzave të ngritura nga SPAK mungojnë provat.

“Sa i përket vendimit të sotëm, mund të them ishte një vendim nën presion. Pranoi që në dosje 90% e akuzës së prokurorëve nuk ka asnjë provë. Prokurorët në 80% të akuzave thonë që ne i kemi perceptime, unë mund t’iu them që në dosje s’ka asgjë. Do shikoni, kam paguar për dashnorët apo jo”, tha Kryemadhi.

SPAK mbylli hetimet për dosjen Meta-Kryemadhi më 28 korrik të vitit të kaluar dhe në fund të gushtit e dërgoi çështjen në gjykatë. Dosja përfshin tre hetime, çështjen CEZ-DIA, lobimin e LSI në Shtetet e Bashkuara të Amerikës dhe hetimin pasuror.

KUSH KALON PËR GJYKIM

Ilir Meta
Akuzat: Korrupsion, pastrim parash dhe fshehje pasurie
Monika Kryemadhi
Akuzat: Korrupsion, pastrim parash dhe fshehje pasurie
Pirro Xhixho
Akuza: Korrupsion
Fatime Kryemadhi
Akuza: Pastrim Parash
Ema Çoku
Akuza: Pastrim Parash

m.a. / dita