Elon Musk befasoi botën e biznesit. Në vetëm pak muaj, ai u bë CEO më i fuqishëm dhe me ndikim në botë, i përfshirë në të paktën pesë kompani – Tesla, SpaceX, Twitter, Neuralink dhe Boring Co.
Përveç botës së korporatave, Musk ka zgjeruar gjithashtu ndikimin e tij në politikë dhe çështjet gjeopolitike. Ai e sheh veten jo vetëm si një sipërmarrës, por si një novator i vendosur të lërë gjurmë në botë. Prandaj përfshihet në të gjitha problemet që i konsideron urgjente për njerëzimin.
Duke e bërë këtë, ai e ka ngritur profilin e tij deri në atë pikë sa veprimet e tij profesionale, ashtu edhe jeta e tij private janë pasqyruar gjerësisht në detaje nga mediat.
Lidhja intime e dyshuar me gruan e shokut të ngushtë dhe krisja e biznesit
Musk gjithashtu e sheh veten si një ndikues. Ai dëshiron të krijojë një lidhje të drejtpërdrejtë me popullin dhe nuk ngurron të deklarojë publikisht gjendjen e tij emocionale dhe kohët e vështira që po kalon.
Verën e kaluar, një artikull në The Wall Street Journal raportoi se Musk dyshohet se kishte një lidhje me Nicole Shanahan, gruan e bashkë-themeluesit të GOOGLE, Sergey Brin, në dhjetor 2021 në Miami. Kjo lidhje e shkurtër e supozuar i dha fund miqësisë midis manjatit të teknologjisë dhe Brin, raportoi gazeta, duke cituar njerëz të njohur me këtë çështje.
Brin, i cili bëri kërkesë për divorc në janar 2022, u tha këshilltarëve të tij që të shesin të gjitha investimet e tij personale në bizneset e Musk, raportoi WSJ. Brin kishte qenë një mbështetës i Teslës në mes të krizës financiare të vitit 2008.
Gazeta nuk tha nëse aksionet e Brin në kompanitë e Musk ishin shitur dhe sa arrinin ato. Shanahan, avokate, po kërkon 1 miliard dollarë për divorcin, pavarësisht se kishte një paramartesë, raportoi WSJ në atë kohë.
Disa orë pas publikimit të artikullit të WSJ, Musk shkroi në Twitter, duke mohuar se kishte pasur ndonjëherë një lidhje me Shanahan dhe duke pretenduar se artikulli ishte një “vrasje karakteri”. Ai gjithashtu tha se ishte ende shok me Brinin.
“Kjo është total bs”, reagoi Musk në Twitter më 24 korrik. “Unë dhe Sergey jemi miq dhe ishim në një festë së bashku mbrëmë! Unë e kam parë Nicole vetëm dy herë në tre vjet, të dyja herë me shumë njerëz të tjerë përreth. Asgjë romantike”, shtoi ai.
Brin shiti aksionet e Tesla dhe i jep goditje Musk
Disa muaj pas raporteve dhe mohimeve, Bloomberg News, duke cituar dosjet me Shërbimin e të Ardhurave të Brendshme, raporton se Brin shiti një bllok të madh të aksioneve të Tesla. Shitja prej 366 milionë dollarësh e aksioneve të Tesla u përfundua brenda katër ditëve duke filluar nga 14 dhjetori 2021, gjatë kohës së lidhjes së dyshuar mes Musk dhe gruas së Brin.
Aksionet e Tesla tregtoheshin me rreth 319 dollarë në kohën kur shiti Brin. Aksionet e prodhuesit të automjeteve elektrike aktualisht tregtohen me rreth 165 dollarë, pas një makthi të vitit 2022, i shënuar nga një rënie prej 65% e çmimit të aksioneve.
Paratë e mbledhura nga kjo shitje u përdorën nga Brin për të krijuar Catalyst4, një organizatë jofitimprurëse e specializuar në shëndetin dhe ndryshimet klimatike. Organizata jofitimprurëse po “mbështet përparime në trajtimin e sëmundjeve/çrregullimeve neurologjike dhe në përpjekjet për të zbutur dhe rikthyer efektet e ndryshimeve klimatike”.
Krijimi i Catalyst4 i lejon Brinit të marrë lehtësime tatimore dhe të rrisë ndikimin e tij politik. Brin është personi i 10-të më i pasur në botë, me një vlerë neto të vlerësuar në 93.2 miliardë dollarë që nga 23 prilli, sipas Indeksit të Miliarderëve të Bloomberg.
a.q. / dita
