Afera ‘Partizani’: GJKKO pranon kërkesën e Mbrojtjes për thirrjen e Ramës, SPAK kërkon Taulant Ballën dhe 10 të tjerë

GJKKO ka pranuar kërkesën e Berishës për të thirrur si dëshmitar kryeministrin Edi Rama në cilësinë e ish-kryetarit të Bashkisë së Tiranës. Sipas mbrojtjes, Rama është person kyç në këtë proces, duke pretenduar se ishte ai personi që përpiloi bazën ligjore për ndryshimin e destinacionit të truallit nga klub sportiv në shesh ndërtimi.

Prokurorja e SPAK Enkelejda Millonai ka kërkuar thirrjen si dëshmitarë të 11 personave, të kreut të grupit të PS Taulant Balla në cilësinë e kallëzuesit, Paro Laci ish-president i klubit të futbollit ‘Partizani, Isa Tare ish-shef i klubit sportiv ‘Partizani, Albert Xhani, Afrim Tola, e të tjerë.

GJKKO ka refuzuar kërkesën për thirrjen si dëshmitar të oficerit të OPGJ Besmir Karanxha, i cili sipas avokatëve të Berishës, është aktivist i Partisë Socialiste dhe se është i paguar për të hetuar kryetarin e opozitës. Sakaq, gjykata ka pranuar të marrë në shqyrtim të gjitha provat shkresore të paraqitura nga SPAK si dhe provat shkresore të kërkuara nga avokatët mbrojtës të të pandehurve.

Seanca e radhës u caktua më 30 prill në orën 12:30.

Dosja për aferën Partizani kaloi për gjykim më 19 maj. Berisha do të gjykohet për akuzën e korrupsionit pasiv të zyrtarëve të lartë pasi akuzohet se, në cilësinë e kryeministrit, ka ndërmarrë veprime konkrete në miratim ligjesh dhe aktesh nënligjore, ku përfitues ishte edhe dhëndri i tij.

Edhe Jamarbër Malltezi është nën akuzë për korrupsion por edhe për pastrim parash. Sipas SPAK, ai ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij.

Ortaku i Malltezit, Fatmir Bektashi akuzohet për korrupsion dhe pastrim parash, ndërsa trashëgimtari i tokës Xhimi Begeja dhe financierja Andia Pustina, që merrej me punët financiare dhe ligjore të kompanisë “Homeplan”, akuzohen për pastrim parash. Po ashtu, në gjyq për pastrim parash janë edhe tre kompanitë “Kontakt”, “Homeplan” dhe “Studio Pustina”.