“Ah sikur të kishe qenë ti në pushtet, qoftë dhe një herë të vetme, këto 32 vjet”! Letër Non Grata-s nga një admirues ‘socialist 24 karatsh’

Nga Viktor Malaj

Botuar në DITA

“Jam Agim Kaçi, socialist 24 karat, por socialist, jo hajdut. Jetojmë keq, s’ka ku vete më. Bashkia e Memaliaj është përtokë fare… Ti je burrë i nderuar, burrë i mirë, bën për popullin… PD-në e sjell ti në pushtet” – Agim Kaçi, Memaliaj

Po hajde o shoku, më fal… zoti Sali! Mirëserdhe! Gjithë populli shqiptar mezi po pret ardhjen tënde. Ku ke qenë kaq kohë? Ç’u bëre? Na ke munguar për besë.

Jetojmë keq e më keq. As kemi punë, as fabrika, minierat nuk punojnë, rinia sillet kot, ne pleqtë iu japim ndonjë kacidhe për të pirë një kafe. Pushteti qendror dhe vendor janë përtokë fare. Korrupsioni vuuu!

Ah sikur të kishe qenë ti në pushtet, qoftë dhe një herë të vetme këto 32 vjet, sa me fat do të kishte qenë Shqipëria dhe ne shqiptarët. As fabrikat e uzinat nuk do të ishin shkatërruar, as minierat nuk do të ishin mbyllur. Do të kishte pasur punë sa të duash, veç a je i zoti të punosh. Askujt nuk do i shkonte ndërmend të votonte kundër teje, madje as ne socialistëve 24 karat, pa lëre atyre pa karat fare që do t’i bashkoheshin idealit tënd të mirëfilltë.

Merreni me mend zoti Sali ku i ka vajtur halli Shqipërisë. Ka rënë në dorë të Erisës dhe Taulantit, kur duhej të ishte në duart e tua, të Flamur Nokës, Salianjit, Klevis Balliut e disa burrave 24 karatësh që të rrethojnë. Pa, lëre më atë sekretaren tënde, Fluturon Garo apo si e quajnë që, megjithëse plak sa ti, më dridhet mishtë kur e shoh në TV dhe mendoj se sa të mira do i sillte Shqipërisë ajo po të ishte në drejtim të punëve.

Mirëserdhe o gjigant! Shqipëria mezi po të pret ta drejtosh ti. Na ka marrë malli për kioskat dhe firmat piramidale që na sollën prosperitet dhe lumturi të pafund. Eh, atëherë hante qeni petulla!

Thonë se je burrë i lig, ke bërë këtë e atë. Po kush e thotë këtë?! Këtë e thonë armiqtë, e brendshëm dhe të jashtëm. Na marrshin të keqen! Ne këtu kemi qenë. Ti, veç mirë ke bërë. Jo, po ke futur ca njerëz në burg, ke rrahur deputetët mu në mes të sheshit Skënderbej dhe iu ke dhunuar votimet e 1996. Po atëherë, çfarë?! Ti, të gjitha këto i ke bërë për të mirën tonë, për të mirën e popullit.

Edhe ata gazetarët zevzekë, që s’të linin rehat me shkrimet e tyre, tani i kanë kuptuar gabimet dhe të lavdërojnë përditë, dikush me gazeta, të tjerë nëpërmjet TV-ve të tyre. Ti, për të mirën e tyre e kishe. E pe se kishin shkarë dhe ishin futur në rrugë të gabuar dhe bëre detyrën e babait, të prindit që ua do të mirën fëmijëve të vet. E rrahura nuk të bën dëm. Kush të do, të rreh, na mëson mençuria popullore. Ua dogje edhe redaksinë e gazetës që villte vrer kundër teje dhe të mirës së Shqipërisë. Po, kush nuk do ta bënte këtë po të kishte mundësi? Vetëm budallenjtë mendojnë dhe predikojnë ndryshe.

Thonë se ke sulmuar institucionet shtetërore në shtator 1998 për të marrë pushtetin me dhunë por s’të lejuan këta të Perëndimit që iu shoftë fara, sepse gjithmonë kundër nesh kanë qenë.

Gojët e liga na thonë se je edhe vrasës se, sipas tyre, paske vrarë protestues paqësorë në bulevard në janar 2011. Po, ç’donin ata atje?! Pse nuk ndenjën në shtëpitë e tyre? A protestohet kundër njerëzve të mirë dhe shpëtimtarëve të kombit?! Ç’të bësh, do të gjesh, na mëson populli.

Kot të shajnë, këta të mitë dhe ata matanë oqeanit. Ti je burrë i nderuar, burrë i mirë, bën për popullin, por Shqipëria është katandisur keq sot, sepse ty s’po të lënë të vish në pushtet. Çfarë ke bërë ti për popullin shqiptar s’e ka bërë askush më parë dhe as pas teje. Pse, pak është t’iu japësh të drejtë mijëra njerëzve nga malet e pyjet të vërsulen drejt qyteteve, të zaptojnë fushat, lëndinat dhe kodrat, të ndërtojnë ku, si e kur të duan, pa i marrë leje kujt?! Pse, në diktaturë jemi ne që të marrim leje ndërtimi, me projekte e më the e të thashë?! Liria e vërtetë është ajo që solle ti. As kishe nevojë për leje ndërtimi, as paguaje taksa, as energji elektrike, ujë apo gjëra të tilla pa kuptim.

Lëre pastaj që korrupsionin, si e luftoje ti askush tjetër s’mund ta bëjë. Mijëra objekte të privatizuara për pesë lekë, gjithnjë për të mirën e fukarenjve, vetëm ti mund t’i bëje sepse ti gjithnjë ke menduar dhe mendon vetëm për popullin.

Thonë se humbën nja 230 milion euro në ndërtimin e Rrugës së Kombit apo miliona të tjerë në privatizimin e Kompleksit Sportiv “Partizani”. Po, pse, nuk e dinë këta dashakëqij që, për të mirën e kombit mund të humben jo qindra milionë, por edhe miliarda euro, mjafton që të ngrihet lart lavdia e ndërtuesit të rrugës dhe mjeshtëria e tjetërsuesit të parave?!

Kam vënë re se armiqtë të akuzojnë për përfitime familjare, për vila, pallate e biznese të tyre të bërë me ndihmën tënde. Pse, çfarë kërkojnë këta myteberë, që t’i linje familjarët e tu nëpër apartamente me qira dhe të mos kishin vila e pallate nga Lalëzi në Sarandë? A nuk e dinë ata se, siç thotë populli, kush s’është për vete, s’është për askënd?

Jo, po, thonë ata se ti je shumë gojëndyrë dhe i fyen njerëzit dhe kundërshtarët politikë duke iu marrë nëpër gojë gjithë njerëzit e familjes dhe, madje, duke u kujtuar dhe kërcënuar se i ke vrarë dhe do t’i vrasësh përsëri. Pse, çfarë presin ata nga një demokrat dhe atdhetar fisnik si ti? T’i respektojë, dëgjojë e mirëkuptojë kundërshtarët politikë?! Nuk e dinë ata fjalën e urtë që thotë se “ashtu i do mushka drutë”?

Tani po na thonë se Amerika, Anglia e ca vende të tjera evropiane të kanë shpallur non-grata dhe nuk të flasin me gojë dhe as të lejojnë të udhëtosh në ato vende pasi, sipas tyre ti ke minuar demokracinë dhe ndihmuar korrupsionin alarmant në Shqipëri. E, ç’rëndësi ka kjo? Ne bëjmë edhe pa ata. Të marrshin të keqen! Ata, asnjëherë nuk na e kanë dashur të mirën. Ty të mjafton që ke me vete popullin shqiptar dhe zotin Ilir Meta i cili, me të drejtë, ka thënë se ti je si vera që, sa më shumë rri, aq më e mirë bëhet, prandaj edhe ka lidhur aleancë me ty, për të mirën tonë dhe të gjithë Shqipërisë.

Ai dhe ne e dimë mirë se, sikur të kishit qenë ndonjëherë në pushtet së bashku ju të dy, Shqipëria do të njihte veç përparim, modernizim dhe aspak korrupsion, siç e dëshmon edhe ajo video e famshme e bërë dikur nga një Prift qoftëlargu.

Dhe tani, nga fundi, nuk mund të rri pa të vënë në dukje edhe ndonjë të metë të vogël që ke shfaqur gjatë karrierës tënde të lavdishme politike. Ke bërë gabimin më të madh që ke mbajtur gjarpërinjtë nën sqetull. Mos i thuaj më Alibej atij që po të konkurron në PD, por i thuaj Alibujku, sepse unë, si i majtë që jam, kam neveri për bujqit dhe shumë admirim për bejlerët.

Prandaj ai Enkelejdi e ka mbiemrin të vjedhur sepse, përderisa nuk është dakord me ty, nuk mund të jetë bej por një bujk i pavlerë. E ku ka qafë dhe këllqe ai të drejtojë PD-në? PD-në vetëm ti e sjell në pushtet dhe askush tjetër.

Sidoqoftë puna, nuk duhet të mërzitesh sepse jam i sigurt se të gjithë Alibujqit që po të kundërshtojnë tani brenda PD-së, në pak kohë do të jenë përreth teje duke t’u servilosur dhe lëpirë si kërmijtë dhe kuakur si bretkosat. Na e ka provuar jeta këtë. A të kujtohen Mocionistët dhe disa qindra karrieristë të tjerë të PD-së që ikën një herë nga ti, të quajtën diktator, antidemokrat, bandit dhe kriminel dhe pastaj, tak-fap, kur ua deshi puna u rikthyen tek ti, u shfaqën të penduar dhe me ndërgjegje të vrarë u shprehën se as ata nuk e dinin pse ishin prishur me z. Berisha? Historia është mësuesja më e mirë.

Sa për të huajt mos u merakos fare. Ata, çfarë thonë sot, s’e thonë nesër. Siç e ke vënë re, deri dje, me dhjetëra herë na thoshin se Ilir Meta kishte kryer krime dhe prandaj i kundërvihej Reformës në Drejtësi sepse besonte se ishte i pandëshkueshëm e tani është i shqetësuar nga mundësia e ndëshkimit, ndërsa këto kohët e fundit e takuan sepse kishin nevojë ta njihnin më mirë dhe të shkëmbenin me të mendime e të kuptoheshin me njëri-tjetrin. Ku i dihet. Ka edhe keqkuptime e keqperceptime. Një ditë mund të të kërkojnë ndjesë edhe ty.

Tani, më duket se u zgjata një çikë si shumë se ty të presin punë të shumta. Të duhet të shkosh edhe në Lazarat, në kërthizën e demokracisë së Jugut të Shqipërisë. Bën mirë që shkon aty sepse qeveria aktuale i mori në qafë duke ua shkatërruar kartelin e drogës, duke i persekutuar dhe, madje, duke kryer ndaj tyre krime kundër njerëzimit. Shko atje, përkulu me respekt përpara tyre dhe nderoje veprën e tyre madhështore për demokraci, të cilën ua ndërpreu padrejtësisht qeverisja socialiste. Duhet të ndihesh krenar që ata të kanë mbështetur vazhdimisht.

Unë jam socialist 24 karatësh. Më quajnë Agim mua. Ti duhet të vish në pushtet. Çfarë të mungon që të mos vish? Ashtu si edhe unë, je në moshën më të mirë, ke një program politik që s’e ka askush tjetër, gjë që ka munguar prej 32 vitesh, ke miq gjithandej në botë. Ata po kthehen në pushtet në të gjitha anët e Evropës, si në Itali, Suedi etj.

Vetëm ata, dhe jo Amerika apo vendet e tjera që të kanë shpallur non-grata, do të na ndihmojnë e shpëtojnë ne si komb, do na mundësojnë vendosjen e demokracisë në Shqipëri, siç patën bërë paraardhësit e tyre shpirtëror e politikë, Duçja dhe Hitleri.

Mos u step për asnjë çast! Do të kesh shumë punë me këta kusarë, por ti dhe vetëm ti mund ta sjellësh PD-në në pushtet dhe të shpëtosh Shqipërinë. Me aleatë të tillë si Lazarati, Mamurrasi e ndonjë katund tjetër nuk do të kesh nevojë për Amerikë, Angli e rrumpallhane të tjera si këto. Mezi po pres të të shoh edhe një herë në timon, sepse ti e mban mirë, drejt dhe me ndershmëri, ecën në rrugën e moralit, drejtësisë dhe demokracisë….