Pas arrestimit të shoferit të autobusit për shkelje të rregullave të qarkullimit rrugor, Policia ka sekuestruar kartelat mjekësore të 63-vjeçarit Agron Xhafa. Kjo pasi para hetuesve ai ka deklaruar se nuk ndodhej në gjendje të mirë në momentin e aksidentit pasi vuan nga zemra dhe diabeti.
Ndërkohë, për llogari të hetimit janë marrë edhe pasagjerët në autobus.
Në momentin e aksidentit ndodheshin 40 pasagjerë. Disa prej tyre morën lëndime të lehta. Gjatë deklarimeve, një pjesë e pasagjerëve kanë mohuar që shoferi të ketë patur probleme shëndetësore.
Nga verifikimet ka rezultuar se mjeti ishte me kontroll teknik të rregullt deri në shtator të këtij viti. Shoferi ka patentë të tipit D. Ndërkohë për llogari të hetimit, grupi hetimor ka nisur edhe ekspertimin autoteknik të autobusit, nëse ka qenë ose në kushte të mira teknike kur ndodhi ngjarja.
Kujtojmë që arrestimi i shoferit të urbanit u bë mbrëmjen e djeshme. Aksidenti ndodhi paraditen e djeshme në zonën e “Shallvareve” në Tiranë ku urbani i linjës së “Unazës” mori përpara disa makina.
Në aksident u përfshinë 11 automjete ndërsa mbetën të lënduar disa persona.
j.l./ dita
