Akuzat për Portin e Durrësit, Rama: Kam bërë 3 vite ecejake tek Princi i Kurorës, po numëroj orët derisa të votohet

Kryeministri Edi Rama doli sot në Kuvend, për të dhënë se janë të vendosur se nuk do të tërhiqen nga projekti i Portit të Durrësi, madje ai u shpreh se mezi po pret të vijë momenti kur ta votojnë.

Nga foltorja e Kuvendit, Rama me nota ironike ndaj opozitës e krahasoi këtë të fundit me gjendjen skandaloze ku ndodhet Porti aktual i Durrësit.

“Një port si në mesjetë, ku lulëzojnë sipërfaqet e ndryshkura dhe ku kalben mjetet lundruese, ku shtrihen mijëra metra katror ferra dhe ndryshqe dhe qytet turistik, kur dëgjon ju dhe shikon këto pamje e kupton pse jemi të shqetësuar. Ju jeni fiks si këto”, u shpreh ndër të tjera Rama.

Rama u ndal tek Porto Palermo, duke thënë se nga një mal me plehra, qyteti i Durrësit përfitoi një park, ndërsa tha se shumë përfitime do të ketë qyteti bregdetar edhe nga Porti i ri.

“Kjo nuk ka lidhje me shekullin e 21, nuk ka lidhje me Evropën dhe turizmin, duhet dhe do zhduket nga faqja e dheut. Nga zhdukja e malit të plehrave në Porto Romanio, sot Durrësi ka fituar një park. Po nga shukja e kësaj çfarë do të fitojë Durrësit?

Personalisht, jo vetëm si kryeministër por edhe si deputeti i Durrësit me shumë padurim dhe me gëzim po numëroj orët derisa të votohet për këtë marrëveshje për investimin më të madh të huaj në historinë e  vendit tonë. Ky investim do ta kthejë portin e Durrësit nga një platformë të zezë si surrati i atyre që e përndjekin Shqipërinë që nga 1912 në një prej porteve më të mëdha të Mesdheut.

Kjo është edhe dita për t’u dhënë disa përgjigje zëdhënësve të rinj të një mallkimi, të një poshtërsie të vjetër që e përndjek si hije këtë vend, që në 1912 që mund të përmblidhet  me shprehjen e lëshuar  mbi fytyrën e një patrioti, si Abdyl Ypi, të nesërmen e shpalljes së pavarësisë”, theksoi Rama.

Rama reagoi ashpër pas akuzave për korrupsion nga ana e opozitës.

Rama tha se të gjitha këto janë shpifje dhe sipas tij bëhen nga pasardhësit e Esat Pashë Toptanit, siç i quan ai krerët e opozitës.

Rama foli edhe për një sërë takimesh dhe negociatash të zhvilluara ndër vite, vetëm e vetëm sipas tij, që i gjithë ky investim në Portin e Durrësit të realizohej.

“Ka 110 vjet që lodër është e shkreta Shqipëri. Një lodër, që siç thoshte Konica është njëlloj si punët tuaja të brëndshme, e ndyrë… Po na marrin portin, është kompania e vëllezërve Rama me vëllezërit Karriç, që në bashkëpunim me Lulzim Bravën po pastrojnë paratë e Lukashenkos dhe Vuçiçit.

Siç thoshte edhe Konica, herën e parë që folëm ishte për Esat Tiranën, por tani na doli edhe një farë Dervishi. Tani hajdeni ma thoni mua, që Esati dhe ky këlyshi, Dervishi, a nuk janë gjallë, duke lëvizur me lodrën Shqipëri në duar.

Tre vite e kusur ecejake, tek princi i Kurorës, për të investuar edhe në Shqipëri, bisedat e panumërta me Muhamet Al-Abar, pastaj takimet me komunitetin në Emiratet e Bashkuara.

Negociata të stërzgjatura, ku në fund janë pranuar vetëm 5 nga 33 kërkesat fillestare të investitorit. Ne këmbëngulnim deri në fund. Deri tek marrëveshja për investimin më të madh të huaj, edhe në historinë e rajonit tonë. Do ta impaktojë 1.2-1.8 % GDP e Shqipërisë. Do të ngrejë peshë vlerën e Durrësit dhe të gjithë Shqipërisë”, u shpreh Rama.

j.l./ dita