Rako Plaku, 36-vjeç, i shpallur në kërkim nga autoritetet italiane për grup kriminal e trafik droge, është vetëdorëzuar në Policinë e Tiranës. Blutë e kryeqytetit njoftojnë se i riu banues në Yzberisht, është vetëdorëzuar në Komisariatin e Policisë Nr. 2, teksa ndaj tij Italia ka lëshuar urdhër-ndalimi për “organizatë kriminale” dhe “trafikimi i narkotikëve”. Në bashkëpunim me Interpol Tiranën, agjentët nga Roma pas njoftimit do vijojnë procedurat për ekstradimin e tij. Rako Plaku u arrestua edhe më 2022 në Itali, si pjesë e një grupi kriminal që sillte kokainë nga Amerika Latine në Europë, por nuk dihet si është lënë i lirë. 36-vjeçari ishte pjesë e grupit të Ergys Dashit, i vrarë në Ekuador në janar 2022. Ergys Dashi kishte lidhje me Plarent Dervishaj, kunati i Lul Berishës dhe Eldi Dizdarin, të dy të shpallur në kërkim ndërkombëtar dhe të strehuar në Dubai, si vendi ku strehohen kriminelët shqiptarë, për shkak se qeveria shqiptare nuk ka marrëveshje ekstradimi me autoritete në Dubai. Dashi në vitin 2014 është arrestuar nga policia italiane po për kultivim droge, si pjesë e një operacioni që çoi prapa hekurave 32 persona. Ekzekutimi i tij ka ndodhur 22 janar në orën 19:00, kur një nga autorët ka hyrë brenda lokalit me synimin për të ekzekutuar Ergys Dashin, ndërsa tjetri e priste jashtë me motor për ta larguar. Autori mbante një buqetë me lule në duar, për t’u ruajtur nga kamerat e sigurisë së barit, dhe teksa i është afruar me vrap tavolinës ku ndodhej Dashi ka nxjerrë armë dhe ka qëlluar për vdekje durrsakun.
Akuzohej për narkotrafik nga Amerika Latine në Itali, dorëzohet për ekstradim Rako Plaku. Mik i Ergys Dashit, i vrarë në Ekuador
