Nuk ka zgjatur shumë izolimi në paraburgim i një prej personave të grupit të dyshuar për hedhjen në erë me eksploziv të pallatit në ndërtim të një biznesmeni në Shëngjin tre vite më parë. 52-vjeçari nga Tirana, i arrestuar me urdhër të Prokurorisë së Lezhës si bashkëpunëtor në vendosjen e lëndës plasëse në vitin 2020, u lirua nga qelia. Zef Kola, i vënë nën akuzë për këtë ngjarje në rolin e porositësit, u njoh me masën e sigurisë “detyrim paraqitjeje”, e dhënë në rrethana e shkaqe të çuditshme. Vendimi u dha nga gjyqtari Artan Hajredinaj, i cili pasi dëgjoi palët, doli në konkluzionin se 52-vjeçari duhet të hetohet në gjendje të lirë.
Por me këtë vendim nuk është pajtuar prokurori i çështjes Françesk Ganaj, i cili ka bërë ankim në Gjykatën e Apelit, me pretendimin se ka prova që implikojnë Zef Kolën në vendosjen e lëndës plasëse në objektin në ndërtim në Shëngjin dhe duhet të qëndrojë në burg. 52-vjeçari u arrestua më 28 shkurt nga Policia e Lezhës, në kuadër të operacionit “Eksplozivi”, pasi dyshohet të jetë bashkëpunëtor në sulmin ndaj godinës në ndërtim të biznesmenit Liman Gjoka, në zonën e “Ranës së Hedhur”, në konflikt të dukshëm pronësie. Ndaj tij janë ngritur akuzat “shkatërrimi i pronës me eksploziv”, “kanosja”, “prishja e qetësisë publike” dhe “mbajtja pa leje e armëve, armëve shpërthyese e municionit luftarak”. Nga hetimet e kryera nën drejtimim e prokurorit Françesk Ganaj, rezulton se 52-vjeçari Zef Kola ka porositur dy të rinj nga Fushë-Kruja që të vendosin lëndën plasëse në objektin në ndërtim, në dy raste brenda 3 javëve. Shkak për ngjarjen dyshohet të jenë bërë konfliktet për pronësinë e truallit ku po ndërtohej objekti disa katesh.
Si autorë janë të ndaluar Erald Pajtani dhe Angli Stafuka, të dënuar përkatësisht me 4 dhe 2 vite heqje lirie, pasi kanë përfituar nga gjykimi i shkurtuar. Biznesmeni Gjoka dëshmoi se pronën e kishte blerë dhe nuk kishte konflikte, por pronësia mbetet shkaku kryesor, teksa të dënuarit duket se nuk kanë bashkëpunuar me drejtësinë.
