Gjykata e Tiranës ka caktuar masën e sigurisë “arrest me burg” për 46-vjeçarin Edmond Arapi, ndërsa ka vendosur “arrest shtëpie” për 16 vjeçarin Arnold Vatocin.
Ky i fundit, me porosi të Edmond Arapit, vendosi tritolin tek fasoneria e biznesmenit Roberto del Gaido në zonën e Freskut, pasi nuk pranoi t’i jepte 100 mijë euro.
Edmond Arapi i kishte vënë gjobë prej 100 mijë euro italianit Roberto del Gaido dhe kërcënuar disa herë që nëse nuk do t’a paguante, do të ishte i rrezikuar, por vetë italiani kishte refuzuar.
Burime bëjnë me dije se para togave të zeza, 46-vjeçari ka mohuar akuzat dhe përfshirjen në ngjarje.
“Nuk e kam njohur as takuar kurrë biznesmenin italian. Nuk kam asnjë konflikt me të. Unë punoj prej disa kohësh në një gurore në Himarë. Qëndroj një pjesë të kohës atje për të siguruar të ardhura për familjen. As djalin (Arnold Vatocin) nuk e njoh as se kam takuar ndonjëherë. S’jam i përfshirë në këtë ngjarje”, ka thënë Edmond Arapi.
Ndërkohë i mituri ka refuzuar të flasë dhe të japë dëshmi duke ia lënë avokatit të tij mbrojtjen. Ndërsa në Policia, ai konfirmoi se i ka thënë Edmond Arapi të vendos tritolin në biznesin fason, në këmbim të 100 mijë lekëve të vjetëra.
Pas shpërthimit në fasonerinë e italianit, Edmond Arapi u fsheh në Himarë ku edhe u arrestua, ndërkohë edhe italiani i fasonerisë është larguar në Itali.
Mësohet se muaj më parë 16-vjeçari Arnold Matoci është arrestuar nga Komisariati nr. 5 në Kamëz si autor i vendosjes së një tjetër sasie tritol në një banesë në Allias dhe gjykata në atë kohë e liroi në masë më të butë për shkak të moshës. Njihet si person problematikë për zonën e Kamzës.
