SPAK shpall pretencën për anëtaren e KPK, Etleda Çiftja e akuzuar për fshehje pasurie dhe falsifikim.
SPAK kërkoi 1 vit e gjashtë muaj burgim për Çiftjan, ndërsa për shkak të gjykimit të shkurtuar dënimi ulet në 1 vit burgim.
SPAK më pas kërkoi të pezullohet dënimi në 2 vite shërbim prove.
Më 30 qershor Prokuroria e Posaçme dërgoi për gjykim gjyqtaren e KPK, të akuzuar për fshehje pasurie dhe falsifikim. Çiftja është anëtare e Komisionit të Pavarur të Kualifikimit.
Sipas SPAK, nga hetimet e kryera ka rezultuar e provuar tej dyshimit të arsyeshëm se e pandehura Etleda Çiftja, në deklaratën me nr 14568 indeksi, datë dorëzimi 17.07.2017, ka kryer deklarim të rremë te pasurisë, e konkretisht në lidhje me burimin e blerjes së apartamentit të banimit, te dy parcelave tokë arë me sip 1450 m2 dhe me sip 3440 m2, mënyrën e fitimit të pronësisë për dy sipërfaqet e tokave arë si dhe në lidhje me qëllimin e marrjes së një kredie pranë ish-Banka Emporiki – Shqipëri sh.a.
Gjithashtu e pandehura Etleda Çiftja, ka dorëzuar pranë ILDKPKI, një kontratë me përmbajtje të falsifikuar, referuar çmimit të pasqyruar në të, provuar tej çdo dyshimi të arsyeshëm, pasi kjo kontratë nuk përputhet me atë të gjendur pranë arkivës së zyrës noteriale ku është përpiluar dhe pranë ASHK-së në momentin e regjistrimit të pasurisë për të cilën është lidhur kjo kontratë.
Gjithashtu kjo kontratë përmban të dhëna të rreme edhe në lidhje me vetë veprimin e pasqyruar në të, pra shitje blerjen e parcelës tokë arë.
j.l./ dita
