Kryetarja e Parlamentit Evropian Roberta Metsola njoftoi sot në fillim të seancës plenare në Strasburg, hetimin që ka nisur ndaj eurodeputetit grek Alexis Georgoulis. Eurodeputeti grek është përjashtuar nga partia SYRIZA PS, pas një kallëzimi penal që po hetohet nga prokuroria belge.
“Kam marrë një kërkesë nga autoritetet kompetente belge për heqjen e imunitetit parlamentar të Alexis Georgoulis. Kërkesa i është referuar komisionit të çështjeve ligjore,” tha Metsola.
Mediat e huaja raportojnë, se kallëzimi penal lidhet me një rast të pretenduar ngacmimi seksual që daton 3 vjet më parë.
Georgoulis, nga grupi i Majtë, e mohoi akuzën duke pretenduar se është një sulm i rremë.
“Përballë këtij sulmi të rremë dhe fyes, që kryhet – ndoshta jo rastësisht – pak ditë para zgjedhjeve kombëtare, unë synoj të bëj betejën time në drejtësi, për të vërtetën dhe rivendosjen e emrit tim, duke kërkuar heqja e imunitetit tim të eurodeputetit.
Në këtë kontekst dhe për shkak se nuk dua aspak të ndikoj në luftën që po bën SYRIZA-Aleanca Progresive, në të gjitha nivelet, me një çështje thjesht personale, po e vë veten në dispozicion të organeve të partisë dhe po jap dorëheqjen si anëtar i partisë si dhe nga Eurogrupi i SYRIZA-PS”, shtoi ai.
Partia SYRIZA-PS kishte njoftuar më herët se do të përjashtonte Georgoulis pasi ishte informuar në lidhje me rastin, ndj të cilit ka nisur një hetim.
m.b/dita
