Një tjetër ish-zyrtare ka lënë qelitë e paraburgimit me masë lehtësuese të drejtësisë, nën rrethana e faktorë familjarë. Gjykata bëhet me dije se ka zbutur masën e sigurisë ndaj Viola Sterjos, në arrest shtëpiak, me arsyetimin e nevojës për kujdestarinë e dy fëmijëve të saj të mitur dhe njëkohësisht për shkak të gjendjes shëndetësore.
Vjola Sterjo u arrestua në muajin dhjetor të vitit të kaluar, për veprën penale të “mashtrim me pasoja të rënda” dhe një dëm total nga ky aktivitet i paligjshëm, që shkonte deri në 344 mijë euro përgjatë dy viteve të fundit.
Për gjendjen shëndetësore është pretenduar edhe momentin e ndalimit, por atëherë gjykata nuk e mori parasysh, duke e lënë në paraburgim. 39-vjeçarja ish-punonjëse në administratë, u vu në pranga pas denoncimit që bënë disa qytetarë të dëmtuar, pasi arriti t’i marrë 344 mijë euro 4 bizneseve në Korçë dhe Pogradec, me premtimin për t’u dhënë leje shfrytëzuese për resortë turistike. Sterjo nuk ka pranuar akuzat, duke pretenduar se nuk ka mashtruar njeri.
Sipas hetimeve paraprake dhe denoncimit, Sterjo arriti të mashtrojë bizneset, duke shfrytëzuar pozitën e saj dhe njohjet në Ministrinë e Turizmit dhe Mjedisit, për të dalë garant tek subjektet se do të fitonin projekte nga AZHBR-ja, me vlera financimi nga 1 milionë, deri në 4 milionë euro. Prokuroria e Korçës e hetoi gjatë Sterjon dhe bazuar në prova, gjykata e la fillimisht në masë arresti me burg. 39-vjeçarja u arrestua në Tiranë, ku edhe jeton. Por pak ditë më parë gjykata e zbuti masën, pas kërkesës së avokatit mbrojtës. Qytetarët rrëfyen edhe skemën se si ish-zyrtarja i mashtronte duke marrë përqindjen për çdo fond financimi që u premtonte.
