Deputeti demokrat Enkelejd Alibeaj do të dorëzojë të hënën listën e komisionerëve për zgjedhjet e 14 majit.
Caktimi i komisionerëve për zgjedhjet e 14 majit, pritet të jetë përballja e parë se cila PD do të regjistrohet në zgjedhje.
Pas Partisë Demokratike të drejtuar nga Sali Berisha, edhe Partia Socialiste dhe Partia e Lirisë kanë depozituar në Komisionin Qendror të Zgjedhjeve (KQZ) komisionerët për vendoret e 14 majit.
Në mungesë të një vendimi përfundimtar nga Gjykata lidhur me grupimin që ka zyrtarisht drejtimin e Partisë Demokratike, Komisioneri Shtetëror i Zgjedhjeve, Ilirjan Celibashi tha në 12 janar se KQZ do të vlerësojë legjitimitetin e personit nga Partia Demokratike që do të sjellë dokumentacionin e duhur. I pyetur specifikisht se cilat janë dokumentet që vërtetojnë legjitimitetin e përfaqësuesve të PD-së, kryekomisioneri sqaroi se do të vlerësohet legjitimiteti i atyre personave që sjellin dokumente që vërtetojnë tagrin për të propozuar anëtarë në KQZ.
Po ashtu Celibashi shtoi se KQZ, dokumentacionin e merr nga Gjykata e Tiranës.
