Unë kullën, ti armët? Vëllai i kryebashkiakut Sako dhe ortaku i vëllait të ministrit Nufi marrin leje për 27 katësh në Tiranë

Këshilli Kombëtar i Territorit dhe Ujit (KKTU), nën varësinë e Kryeministrit, ka zbardhur një tjetër leje ndërtimi. Bëhet fjalë për një kullë masive 27-katëshe në Bulevardin e Ri të Tiranës, ku përfitues janë sërish njerëz të lidhur me pushtetin: Artan Sako (vëllai i Gramos Sakos, kryetar i Bashkisë së Tepelenës) përmes firmës “2T”, dhe Hamz Islamaj përmes firmës “Be–Is”, i cili rezulton ortak në biznesin “Maritime Logistics” me Edmir Nufin, vëllain e Ministrit të Mbrojtjes, Ermal Nufi. ​Ky rast ngre dy pikëpyetje të mëdha e të rënda.

E para: Si ka mundësi që të gjithë politikanët tanë dhe familjarët e tyre bëhen brenda natës investitorë me kapacitete financiare miliona eurosh për të ndërtuar masivë betoni?  E dyta, dhe më alarmantja, sipas hetimit të VOX kjo leje u mbajt “pezull” në sirtar me kushtin: “Unë të firmos kullën, nëse ti më firmos kontratat e armëve”. Dyshimet e forta bien mbi Ministrin e ri të Mbrojtjes, i cili duhet të firmosë për kontratat e armatimeve me firma dhe individë izraelitë të sanksionuar nga Bashkimi Evropian. Nëse ky përfundim i hetimit është i saktë, kjo tregon se lejet dhe tenderat nuk janë më akte administrative. Më poshtë, pjesë nga artikulli:
​

Mazhoranca po përdor një skemë të mirëfilltë përfitimi, ku vëllezërit apo njerëzit e afërt të tyre, nëpërmjet firmave në pronësi apo të bashkëpunëtorëve, po përfitojnë leje, tendera dhe prona publike.

Deri më tani, përveç disa grricjeve nga SPAK-u, skema sa vjen e sofistikohet.

Këtë herë përfitues është vëllai i kryetarit të Bashkisë së Tepelenës dhe ortaku i vëllait të ministrit të Mbrojtjes. Gramos Sako dhe Ermal Nufi, kanë përfituar pak ditë më parë, lejen në të cilën kryeministri Edi Rama dhe ministri i ri i Infrastrukturës dhe Energjisë, Enea Karakaçi, kanë vënë firmën dhe vulën.

Veç faktit që politikanët dhe familjet e tyre dalin të gjithë të kamur dhe ndërtues projektesh që kushtojnë miliona euro, bie në sy që ky projekt u mbajt për muaj të tërë në sirtar

Sipas faqes VOX që ka publikuar investigimin kjo leje është mbajtur me qellim “pezull”, për të parë nëse ministri i Mbrojtjes, Ermal Nufi, do të firmoste gjithçka që i kërkonte kryeministri Edi Rama, veçanërisht kontratat e armëve që synon që t’ua japë firmave dhe individëve izraelitë, të sanksionuar nga BE-ja.

Çfarë u firmos

Rama dhe Karakaçi i kanë dhënë lejen në datën 27 prill 2026 firmës 2T dhe Be – Is, për ndërtimin e një godine të stërmadhe 27 kate.

Sipas dokumenteve, objekti pozicionohet në Bulevardin e Ri në Tiranë. Një ndërtim voluminoz, si në gjerësi ashtu edhe në lartësi, teksa ajo që bie në sy është shfrytëzimi në maksimum i truallit, duke e kthyer parcelën në një masiv të madh betoni.

Nga dokumentet në Qendrën Kombëtare të Biznesit, rezulton se firma 2T ka si pronar me letra Artan Sakon, vëllain e Gramos Sakos, ish komandant i Gardës së Republikës, dhe aktualisht kryetar i Bashkisë së Tepelenës. Ortaku tjetër i 2T-së është Dritan Troksi, shok fëmijërie i Artanit.

Pronar i kompanisë Be – Is është shtetasi Hamz Islamaj, i cili para se ti futej kullave, ka marrë dhjetëra miliona euro para publike kryesisht nga Fondi Shqiptar i Zhvillimit dhe nga Drejtoria e Përgjithshme e Rrugëve. Të dyja kompanitë, si 2T ashtu edhe Be – Is janë të njohura për fitimin e dyshimtë të procedurave prokuruese nga institucionet e varësisë së Ministrisë së Infrastrukturës dhe Energjisë.

Sako dhe Islamaj, njihen si njerëz të klanit Balluku brenda mazhorancës. Tani, sërish me firmën e një ish vartësi të Ballukut, siç është ministri i ri i Infrastrukturës, marrin lejen për kullë – shkruan VOX.

Sipas raportimit një rol tepër aktiv në këtë leje ka pasur Ermal Nufi, ministër i Mbrojtjes, i cili gjithashtu më parë ka qenë vartës i Ballukut, ndërsa ka dyshime se emërimi i tij është bërë me lobim të fortë nga ish-zëvendës kryeministrja nën hetim.

Gramos Sako dhe Ermal Nufi, dalin në këtë leje nëpërmjet vëllezërve. Edmir Nufi, vëllai i Ermalit, është ortak me Hamz Islamajn, në firmën “Maritime Logistics”. Pikërisht kjo ortakëri ka qenë mjaft fitimprurëse për firmën Be – Is apo edhe për pronarin e saj, i cili ka arritur të marrë leje për ndërtime HEC-esh, tendera rrugësh e tani leje ndërtimi për kulla nga institucionet e varësisë të Ministrisë së Infrastrukturës dhe Energjisë.