Ambasadori i Shqipërisë në OKB, Ferit Hoxha, në një intervistë televizive për mediat portugeze ka deklaruar se Rusia duhet të përjashtohet nga Këshilli i Sigurimit të OKB-së. Hoxha tha se Rusia me me pushtimin e Ukrainës, ka shkelur rëndë Kartën e Kombeve të Bashkuara.
“Në aspektin moral, natyrisht, një vend që nuk respekton kartën e Kombeve të Bashkuara. Rusia sot nuk është një vend që aderon në paqe. Prandaj, Rusia duhet të jetë, natyrisht, jashtë Këshillit të Sigurimit dhe jashtë OKB-së. Por ne nuk mund ta bëjmë këtë. Sepse për të ndryshuar përbërjen e Këshillit, na duhen jo vetëm dy të tretat e votave anëtarëve të Kombeve të Bashkuara, por edhe pesë anëtarët e përhershëm. Kështu që unë nuk shoh që Rusia të votojë kundër vetvetes”, tha diplomati shqiptar.
Sipas ambasadorit shqiptar në OKB, Ferit Hoxha, në këtë moment nuk shihet asnjë mundësi për negociata.
“Unë mendoj se kjo luftë e nisur nga Rusia dhe ndoshta nga një person në Rusi (Vladimir Putin) është në një lloj pike pa kthim. (…) Ne shohim se Rusia është ende e bindur se Ukraina nuk duhet të ekzistojë, se territori i Ukrainës mund të jetë rus dhe ata kanë aneksuar zyrtarisht katër territore të reja, përveç Krimesë. Prandaj, ne nuk shohim asnjë mundësi, asnjë oreks për negociata tani”, vlerësoi ai.
m.b./dita
