Ambasada e Holandës ka reaguar lidhur me konferencën Ndërqeveritare Shqipëri-BE.
Në një reagim në Facebook, ambasadori i Holandës në Shqipëri, Reinout Vos, ka vlerësuar progresin e Shqipërisë në procesin e integrimit evropian, gjatë Konferencës Ndërqeveritare që zhvillohet sot në Bruksel mes Shqipërisë dhe Bashkimit Evropian.
Në deklaratën e tij, diplomati holandez theksoi se arritja e objektivave të ndërmjetme në grupkapitullin “Themeloret” përbën një hap të rëndësishëm në rrugën e Shqipërisë drejt anëtarësimit në BE.
Ai përgëzoi qytetarët shqiptarë, si edhe përfaqësuesit e politikës, administratës publike dhe sistemit të drejtësisë për kontributin dhe angazhimin e tyre në këtë proces.
“Shqipëria është pjesë e familjes evropiane. Holanda mbështet fuqimisht anëtarësimin e saj në Bashkimin Evropian”, deklaroi Vos.
Sipas tij, forcimi i shtetit ligjor, mbrojtja e të drejtave themelore dhe garantimi i një demokracie pluraliste mbeten në themel të vlerave evropiane dhe ndikojnë drejtpërdrejt në ritmin e negociatave të Shqipërisë me BE-në.
