Ambasadori Italian në Tiranë Fabrizzio Bucci, gjatë një pritjeje të organizuar prej tij me deputetë të grupit të miqësisë Italo-Shqiptare në Kuvendin e Shqipërisë, në Rezidencën e Ambasadës italiane në Tiranë, bëri apel për uljen e tensioneve dhe fokusimin tek prioritetet sicc është integrimi në BE.
Referuar protestave të opozitës, ambasadori Italian tha se kjo panoramë është e njëjtë gjithnjë disa muaj para zgjedhjeve ku ndizen fishekzjarrët.
“Këtu politika është e ngjashme me atë të Italisë, nuk mërzitesh asnjëherë, ka shumë aksion, ndoshta më shumë se çduhet. Shoh këtu deputetë nga familje të ndryshme politike. Politika ju ndan dhe kjo është mëse natyrale.
Por, të qënit këtu sonte tregon se ka gjëra më të rëndësishme që ju bashkojnë, siç është miqësia mes Shqipërisë dhe Italisë”- tha ambasadori italian Fabrizzio Bucci.
Ai u kujtoi deputetëve të pranishëm se s’duhet të vazhdojnë pa fund me tensione e konflikte, por duhet të fokusohen tek përpjekjet për të mirën e përgjithshme.
“Është e shëmtuar të shohësh që manifestimet ndonjëherë shpërthejnë në dhunë. Manifestimet janë natyrale, demokracia ushqehet edhe përmes përballjes, por në respekt të rregullave dhe rrugë paqësore. Europa ju sheh, dhe tani është në durat tuaja integrimi.
Ritmi i negociatatve varet nga ju dhe nga koha që ju duhet që i gjithë parlamenti dhe institucionet shqiptare të jenë në nivelin e standardeve europiane.
Në të gjithë këtë proçes, në 30 vitet e shkuara, por dhe në 30 vitet e ardhshme, dhe në 300 vitet e ardhshme do të jemi gjithnjë, siç kemi qenë gjithnjë në krahun tuaj”- u shpreh ambasadori italian në Tiranë Fabrizzio Bucci.
m.b./dita
