Tensioni është i dukshëm në disa pallate mbretërore europiane pas arrestimit të Andrea Mountbatten Windsor. Disa figura, përfshirë edhe anëtarë të fronit, rezultojnë të përfshirë në skandalin “Esptein” që vazhdon të sjellë surpriza…
E ardhmja e mbretëreshës së Norvegjisë
Në dokumentet e deklasifikuara nga Departamenti i Drejtësisë i SHBA-ve më 30 janar, emri i Mette-Marit të Norvegjisë, 52 vjeçe, e cila pritet të bëhet mbretëresha bashkëshorte pranë bashkëshortit të saj Haakon, përmendet më shumë se 1 mijë herë. Mesazhet e publikuara nga gazeta Verdens Gang tregojnë një lidhje të mundshme të saj me Jeffrey Epstein, në vitin 2012, ajo i shkruante “Je një thesar” nga llogaria e saj H.K.H. Crown Princess.
Ashtu sikurse Sarah Ferguson, duket se edhe Mette-Marit tërhiqej nga fuqia e tij dhe pasioni i Epstein për vajzat e reja nuk duket se e shqetësonte: “Kam takuar dy norvegjeze, 24 dhe 25 vjeç, më pëlqen Oslo”, shkruante ai. Kur ai i thoshte në Paris në vitin 2012 se ishte “në kërkim të një gruaje”, ajo përgjigjej me shaka: “Kryeqyteti francez është i përshtatshëm për tradhti, por gratë skandinave janë bashkëshortet më të mira”.
Në janar 2013, Mette-Marit fluturoi për në Florida për të kaluar katër ditë në vilën e Epstein në Palm Beach së bashku me një mikeshë të saj, por sot shprehet e penduar dhe e vetëdijshme për gabimin. Ajo ka deklaruar: “Është thjesht e sikletshme”, ndërsa familja mbretërore Glücksburg përballet me krizë të thellë: përfshirja e saj në këtë rast konfirmohet, ndërsa djali i saj, Marius Borg Høiby, përballet me akuza të rënda, përfshirë përdhunimin. Gjithashtu, Mette-Marit vuan nga fibroza pulmonare dhe gjendja e saj ka degraduar aq shumë sa i duhet një transplant i mushkërive. Çfarë do të ndodhte nëse mbreti Harald V, 88 vjeç më 21 shkurt, nuk do të ishte më?
Princesha e suedeze, ish-modele
Princesha Sofia nuk ishte mike e Epstein, por rrezikoi të bëhej viktimë e tij. Ajo e takoi atë para martesës me Carl Philip, djalin më të vogël të mbretit Carl XVI Gustaf, kur ishte një modele e re që kërkonte mundësi për të hyrë në botën e showbiz-it. Në vitin 2005, mentoreja e saj, Barbro Ehnbom, i shkruante Epstein: Sofia është një aktore në fillimet e saj në New Yrok. Është vajza për të cilën të kam folur; do të donit ta takonit?
Epstein i përgjigjej: Jam në Karaibe. A do të donte të vinte disa ditë? Do t’i dërgoj biletë.
Pallati mbretëror thotë se Sofia nuk pranoi, megjithëse e pa disa herë atë vit. Ajo ka deklaruar më 10 shkurt: E takova në disa kontekste sociale. Fatmirësisht, vetëm kaq. Kam lexuar për krimet e tmerrshme ndaj vajzave të reja dhe jam e kënaqur që nuk kam pasur kontakte të tjera me të.
Princi i Belgjikës, vëllai i mbretit Philippe
Rrjeti i dyshimtë i kontakteve të Epstein shtrihet deri te pallati mbretëror belg, ku ai hyri në kontakt në fund të viteve ’90 me Laurent, vëllai i mbretit Philippe. Princi, i cili ka një reputacion të diskutueshëm për një akuzë të vjetër për shfrytëzim të fondeve të Marinës belge dhe për një fëmijë nga një lidhje jashtëmartesore, pranoi se e kishte takuar Epstein “vetëm” dy herë. Ai tha se Epstein dëshironte të takonte prindërit e tij dhe t’i prezantonte me miqtë miliarderë, por ai nuk e kishte ndjekur këtë kërkesë, dhe takimet ndodhën para dënimit të parë të Epstein për prostitucion me të mitura.
Mbreti danez
Mbreti danez Frederik X përmendet dy herë në dokumentet e rastit Epstein, sipas gazetës daneze Ekstra Bladet. Një herë në lidhje me një ngjarje në mars 2012 dhe një tjetër në një darkë më 26 korrik 2012, por nuk dihet nëse ai ishte i pranishëm në të dy rastet.
Princi saudit
Epstein shtrihet deri në oborrin mbretëror saudit, duke ndërtuar miqësi me Al-Sabbagh, këshilltar i princit Mohammed bin Salman, duke ofruar lidhje me njerëz në Silicon Valley. Sipas New York Times, Al-Sabbagh njihte reputacionin e amerikani, pasi ai i kishte dërguar një artikull për një “mbretëreshë bukuroshe ruse” që kishte shkuar në Dubai për të “shitur virgjërinë për 13 mijë dollarë”. Epstein iu përgjigj: Më në fund më dërgon diçka të dobishme.
j.l./ dita
