Persona ende të paidentifikuar, por që dyshohet se janë motivuar politikisht, i kanë vënë szjarrin makinës së parkuar të një anëtareje të qendrës së numërimit të votave në Sarandë. Policia vendore bëri me dije se ngjarja ka ndodhur mesnatën e së dielës, duke zbardhur dita e djeshme, në fshatin Shalës, Bashkia Konispol. Mësohet se automjeti është në pronësi të Ada Murtaj, e cila është dhe anëtare e KZAZ 92 në Konispol.
Ngjarja u denoncua nga vetë pronarja e mjetit, teksa zjarrfikësit dhe banorët u munduan të minimizonin dëmet. Mjeti është shkrumbuar plotësisht, teksa nisën hetimet për këqyrjen e vendngjarjes dhe gjetjen e provave.
Sipas dëshmisë paraprake të Murtaj, nuk ka pasur konflikte me asnjë person në fshat dhe djegia e mjetit sipas saj, lidhet me angazhimin e saj politik, në mbështetje të kandidatit Ergest Dule, i cili është zgjedhur kryebashkiak i Konispolit. Pranë saj, në momentin kur ka marrë lajmin, ka qenë edhe deputetja e PS Anila Denaj. Ndërkohë nga ana e policisë nuk ka asnjë reagim për sqarimin e rrethanave të ngjarjes, por mësohet se kanë nisur menjëherë verifikimet për zbardhjen e plotë të rrethanave.
