Anëtarësimi në BE brenda vitit 2030, Parlamenti Evropian miraton raportin për Shqipërinë

Komisioni i Punëve të Jashtme në Parlamentin Evropian ka miratuar me 57 vota pro, 11 kundër dhe 6 abstenime raportin për Shqipërinë, i përgatitur nga Andreas Schieder.

Raportuesi austriak nënvizoi se Shqipëria është tashmë një shtet pararojë me reformat integruese me objektiv anëtarësimin e vendit në familjen evropiane brenda vitit 2030.

Në këtë raport u bëhet thirrje palëve për dialog politik për të zbatuar në praktikë rekomandimet e OSBE-ODHIR.

Puna e organeve të reja të drejtësisë, në veçanti e SPAK-ut, në ndëshkimin e zyrtarëve të lartë të korruptuar është vlerësuar maksimalisht në këtë raport.

Në këtë mbledhje Kuvendi i Shqipërisë u përfaqësua nga deputetët Jorida Tabaku, Oerd Bylykbashi, Toni Gogu dhe Etjen Xhafaj.

Ky komision do të njihet në orët në vijim edhe me raportin e vëzhguesve të Parlamentit Europian për zgjedhjet parlamentare të 11 majit në vendin tonë.

RAPORTI

Komisioni për Punët e Jashtme vlerëson angazhimin e palëkundur të Shqipërisë për anëtarësimin në BE

Komisioni për Punët e Jashtme i Parlamentit Europian ka vlerësuar përkushtimin e qëndrueshëm të Shqipërisë ndaj procesit të anëtarësimit në Bashkimin Europian, në një raport të miratuar të mërkurën, me 57 vota pro, 11 kundër dhe 6 abstenime.

Konsensus i gjerë dhe përputhje me politikën e jashtme të BE-së

Eurodeputetët theksojnë konsensusin e gjerë politik dhe mbështetjen e fortë të opinionit publik në Shqipëri për anëtarësimin në BE, si dhe përputhjen e plotë të vendit me politikën e jashtme dhe të sigurisë së Bashkimit Europian.

Nevoja urgjente për thellimin e reformave

Duke përshëndetur synimin e Shqipërisë për të përmbyllur bisedimet e anëtarësimit deri në vitin 2027 dhe progresin e arritur deri më tani, raporti nënvizon nevojën urgjente për të intensifikuar reformat. Prioritetet kryesore përfshijnë forcimin e pavarësisë së gjyqësorit, luftën kundër korrupsionit dhe krimit të organizuar, si dhe mbrojtjen e të drejtave themelore. Pluralizmi mediatik dhe rritja e transparencës mbeten elementë thelbësorë për forcimin e besimit të publikut.

Raporti evidenton polarizimin e vazhdueshëm politik, të shoqëruar nga një retorikë konfrontuese, dhe bën thirrje për një dialog më gjithëpërfshirës dhe konstruktiv ndërmjet forcave politike. Eurodeputetët shprehin shqetësim serioz për ndikimin e dëmshëm të aktorëve të huaj, veçanërisht atyre të lidhur me Kremlinin, të cilët përbëjnë kërcënim për institucionet demokratike të Shqipërisë dhe aspiratat e saj për anëtarësim në BE. Ata kërkojnë rritje të qëndrueshmërisë institucionale ndaj abuzimeve me financimet politike, manipulimeve mediatike dhe kërcënimeve kibernetike.

Mbështetje përmes iniciativave të BE-së

Raporti përshëndet krijimin e Instrumentit për Reforma dhe Rritje prej 922 milionë euro për Ballkanin Perëndimor, nga i cili do të përfitojë edhe Shqipëria, sapo të plotësohen kushtet përkatëse. Hapja e zyrës së antenës së Parlamentit Europian në Tiranë konsiderohet një hap i rëndësishëm drejt forcimit të lidhjeve ndërmjet BE-së, institucioneve vendase dhe shoqërisë civile në rajon.

Zgjedhjet dhe reforma në drejtësi

Raporti ndalet edhe tek zgjedhjet parlamentare të majit 2025, të cilat i cilëson konkurruese, por të zhvilluara në një klimë të lartë polarizimi politik, me shqetësime për përdorimin e burimeve shtetërore gjatë fushatës. Eurodeputetët u bëjnë thirrje partive politike shqiptare që të angazhohen në një reformë të plotë zgjedhore, në përputhje me rekomandimet e OSBE/ODIHR-it dhe Komisionit të Venecias.

Vlerësohet progresi në reformën në drejtësi dhe në hetimin e korrupsionit në nivelet e larta, por theksohet se ndërhyrjet politike vazhdojnë të përbëjnë sfidë. Raporti bën thirrje për përpjekje të vazhdueshme për ruajtjen e pavarësisë së gjyqësorit dhe rritjen e llogaridhënies.

Deklarata e raportuesit

Raportuesi Andreas Schieder (S&D, Austri) u shpreh: “Shqipëria me të drejtë mund të quhet një nga vendet më të avancuara ndër kandidatët për anëtarësim në BE, falë mbështetjes së gjerë nga popullsia. Por nuk kemi arritur ende në vijën e finishit. Është jetike të vazhdohet me të njëjtin ritëm dhe përkushtim, duke luftuar korrupsionin dhe forcuar sundimin e ligjit. Duhet të ketë një fokus të qartë në zgjerimin e modelit ekonomik, krijimin e vendeve të punës, përmirësimin e mirëqenies sociale dhe realizimin e një reforme zgjedhore gjithëpërfshirëse.”

Hapat e mëtejshëm

Raporti do t’i paraqitet seancës plenare të Parlamentit Europian për votim në një fazë të ardhshme.

j.l./ dita