Angela Merkel: Nuk pendohem për blerjen e gazit rus, ishte më i liri

Angela Merkel ka mbrojtur vendimin e saj si kancelare e Gjermanisë për të blerë sasi të konsiderueshme gazi natyror nga Rusia.

“Në bazë të kushteve në atë kohë, ishte shumë logjike dhe e qartë të merrej gaz nga tubacionet, përfshirë edhe nga Rusia, i cili ishte më i lirë se gazi natyror i lëngshëm nga pjesë të tjera të botës”, tha Merkel në përgjigje të një artikulli të Politico, që më herët sot prezantoi një vlerësim të qeverisë gjermane nën kancelaren Merkel, katër muaj para pushtimit rus të Ukrainës, e cila nuk arriti të njohë rreziqet e varësisë nga burimet energjetike ruse.

Ish-kancelarja shtoi se nuk i vjen keq për vendimin e saj për të blerë gaz natyror nga Rusia, duke theksuar se “edhe gjatë Luftës së Ftohtë, Rusia ishte një furnizues i besueshëm i energjisë”.

Merkel vuri në dukje se Gjermania duhet të diversifikojë kanalet e saj të furnizimit me energji, megjithatë, siç theksoi ajo, është e qartë se vendi ka nevojë për gaz natyror gjatë kësaj periudhe tranzicioni.

Ish-kancelarja gjermane Angela Merkel tha gjithashtu sot se nuk është penduar për politikën energjetike që ndoqi gjatë 16 viteve të saj në pushtet, një politikë që e ka bërë Rusinë një nga furnizuesit më të rëndësishëm në botë të gazit natyror të vendit të saj dhe, sipas kritikëve e ka lënë ekonominë më të madhe të Evropës tepër të varur nga gazi rus.

Gjermania dhe vende të tjera evropiane po përpiqen t’i japin fund varësisë së tyre nga nafta dhe gazi natyror rus pas pushtimit rus të Ukrainës. Vitin e kaluar, 55% e importeve gjermane të gazit erdhi nga Rusia, pjesërisht si rezultat i ndjekjes së lidhjeve tregtare të Merkelit me Rusinë dhe mbështetjes për gazsjellësin Nord Stream 2, edhe pasi Moska aneksoi Krimenë në 2014.

a.m/dita