Ish-kryetari i Bashkisë së Lushnjës, Fatos Tushe rikthehet në burg.
Gjykata e Apelit ka ndryshuar dënimin për Tushen, të cilin e gjeti fajtor edhe për akuzën e shkeljes së barazisë në tendera, duke e dënuar me 3.4 vite heqje lirie.
Tushe fillimisht u dënua me 2.4 vite burg, por këtë vendim e ndryshoi Gjykata e Apelit këtë të mërkurë, ku krahas vendimit për ta rikthyer në burg ka shtuar edhe kohëzgjatjen e vuajtjes së dënimit.
Tushe akuzohet për abuzim me një tender me vlerë 23 milionë lekë për rehabilitimin e një kanali vaditës në njësinë administrative Kolonjë.
Tenderi dyshohet të jetë fituar në mënyrë fiktive nga një kompani, ndërsa punimet në terren u kryen nga një tjetër kompania e administruar nga Ibrahim Lami, që sipas SPAK, privilegjohej në tenderimet e Bashkisë.
Ndërsa “shpërdorimi i detyrës” nga Tushe dyshohet të jetë bërë përmes shpërdorimit të karburantit të Bashkisë dhe lejimit të një ndërtimi pa leje. Ai u përgjua nga SPAK, teksa lejonte dhënien e sasive të karburantit personave të paautorizuar, si edhe porositë ndaj një qytetari që po ndërtonte pa leje, të tipit: “Thuaji që kam folur me kryetarin”.
j.l./ dita
