Arrestimi i Ballukut, kërkohet përsëri mbledhja e Këshillit për Imunitetet të martën

Është depozituar një tjetër kërkesë zyrtare për zhvillimin e mbledhjes së Këshillit të Mandateve dhe Imunitetit ditën e martë, 6 janar 2026, në orën 11:00, me qëllim shqyrtimin e kërkesës për heqjen e imunitetit parlamentar të zv.kryeministres dhe ministres së Infrastrukturës dhe Energjisë, Belinda Balluku, duke i hapur rrugë arrestimit të saj.

Sipas burimeve parlamentare, deputetët kërkues të opozitës do të paraqiten në Kryesinë e Kuvendit për formalizimin e mbledhjes, por mazhoranca pritet të mos marrë pjesë, duke rrezikuar sërish mungesën e kuorumit dhe shtyrjen e procesit.

Kjo është hera e katërt që anëtarët demokratë të Këshillit kërkojnë thirrjen e këtij organi për çështjen e Ballukut. Mbledhja e fundit, e zhvilluar më 19 dhjetor 2025, zgjati rreth pesë orë, por përfundoi pa një vendim për datën e seancës pasuese, për shkak të mospajtimit mes palëve.

Gjatë asaj mbledhjeje, u theksua se materiali i depozituar nga SPAK ishte voluminoz, përmbante prova dhe argumente të shumta dhe kërkonte kohë për shqyrtim të plotë.

Avokati i Belinda Ballukut, i pranishëm në seancë, kërkoi tre javë kohë për t’u njohur me dokumentacionin e prokurorisë.

Mazhoranca e mbështeti këtë kërkesë, duke argumentuar se e drejta e mbrojtjes duhet respektuar, si dhe duke theksuar nevojën për të pritur edhe vendimin e Gjykatës Kushtetuese, lidhur me ankimimin e kryeministrit për konflikt kompetencash mes qeverisë dhe Strukturës së Posaçme Kundër Korrupsionit dhe Krimit të Organizuar (SPAK). Në këto kushte, u vendos që mbledhjet të rifillonin pas datës 22 janar 2026.

Hetimet ndaj Belinda Ballukut lidhen me procedura infrastrukturore me vlerë qindra milionë euro. Ajo është e pandehur për shkelje të dyshuara në tenderin e Tunelit të Llogarasë, ndërsa po ashtu është nën hetim për procedurat që lidhen me shtatë lotet e projektit të Unazës së Madhe në Tiranë.

Këshilli i Mandateve dhe Imunitetit është organi parlamentar përgjegjës për shqyrtimin e kërkesave të prokurorisë për heqjen e imunitetit të deputetëve dhe anëtarëve të qeverisë që kanë mandat parlamentar. Procedura përfshin dëgjesa me palët, përgatitjen e një raporti dhe, nëse arrihet në një përfundim, votimin përfundimtar në seancë plenare të Kuvendit.

Mbetet për t’u parë nëse kërkesa e re e opozitës do të çojë në mbledhjen e Këshillit më 6 janar, apo nëse procesi do të shtyhet sërish për shkak të mungesës së konsensusit politik dhe procedurave në zhvillim.

m.a. / dita