Amarildo Shabani, 33 vjeç, banues në Tiranë, ka marrë peng gruan e tij dhe e ka dhunuar për disa orë.
Mësohet se e reja, identiteti i të cilës nuk bëhet me dije, punon në një farmaci në rrugën “Qazim Vathi”.
Pikërisht në këtë subjekt është paraqitur Shabani, i cili e ka marrë me forcë dhe e ka dërguar në një lokal ku e ka dhunuar për orë të tëra, në kundërshtim me urdhrin e Gjykatës që e kishte pajisur gruan me urdhër mbrojtjeje.
Qëllimi i 33-vjeçarit ka qenë ta bindte atë që të riktheheshin bashkë, duke i kërkuar falje për herët e tjera që e ka dhunuar.
Më ndërhyrjen e policisë, 33-vjeçari Amarildo Shabani është vënë në pranga. Gruaja ka rrëfyer para grupit hetimor, pasi ai e dhunonte dhe për shkak të xhelozisë nuk e lejonte të shkonte në punë.
Njoftimi i Policisë:
Tiranë
I hoqi lirinë dhe ushtroi dhunë ndaj bashkëshortes së tij, e cila ishte e pajisur me urdhër mbrojtjeje, falë veprimeve të shpejta profesionale të shërbimeve të Policisë, kapet dhe vihet në pranga 33-vjeçari.
Shërbimet e Komisariatit të Policisë Nr. 4, pas njoftimit se një shtetas kishte marrë me forcë bashkëshorten e tij nga vendi i saj i punës, e kishte çuar atë në një lokal, pa dëshirën e saj, dhe më pas e kishte dhunuar, menjëherë kanë organizuar punën për kapjen e tij.
Si rezultat i veprimeve të shpejta profesionale nga shërbimet e Policisë, u bë arrestimi në flagrancë i shtetasit:
– Amarildo Shabani 33 vjeç, banues në Tiranë, për veprat penale “Heqja e paligjshme e lirisë”, “Dhuna në familje” dhe “Veprime në kundërshtim me vendimin e gjykatës”.
Ky shtetas ka marrë me forcë bashkëshorten e tij, nga subjekti privat ku ajo punonte, në rrugën “Qazim Vathi”, e ka dërguar në një lokal dhe më pas ka ushtruar dhunë fizike dhe psikologjike, në kundërshtim me vendimin e Gjykatës, e cila e kishte pajisur këtë shtetase me urdhër mbrojtjeje.
Materialet i kaluan Prokurorisë, për veprime të mëtejshme procedurale.
j.l./ dita
